डहाणू || महिना होत आला वंकास परिसर अंधारात, संतप्त महिलांची महावितरण कार्यालयाला घेराव...चौथी मुंबई

२० ते २५ दिवसांपासून वंकास परिसर अंधारात; संतप्त महिलांची महावितरण कार्यालयात पायपीट 'चौथी मुंबई'च्या घोषणांनंतरही ग्रामीण भाग अंधारात; वीजपुरवठ्यासाठी १०० ते १५० महिलांची महावितरण कार्यालयावर धडक तलासरी प्रतिनिधी : डहाणू तालुक्यातील वंकास परिसरातील तीन ते चार पाड्यांमध्ये गेल्या २० ते २५ दिवसांपासून वीजपुरवठा पूर्णपणे खंडित असल्याने हजारो नागरिक अंधारात जीवन जगण्यास मजबूर झाले आहेत. सलग अनेक दिवस वीज नसल्याने विद्यार्थ्यांचे शैक्षणिक नुकसान, नागरिकांचे दैनंदिन जीवन विस्कळीत होणे, तसेच पावसाळ्यात गंभीर जीवितहानीचा धोका निर्माण झाला आहे. वारंवार तक्रारी करूनही महावितरण प्रशासनाने ठोस उपाययोजना न केल्याचा आरोप ग्रामस्थांनी केला आहे. सध्या परिसरात मुसळधार पाऊस सुरू असून अनेक ठिकाणी चिखल, पाणी साचणे आणि अंधाराचे साम्राज्य पसरले आहे. ग्रामीण भागात साप, नाग, घोणस, फुरसे तसेच इतर विषारी जीवजंतूंचा वावर मोठ्या प्रमाणात वाढला आहे. अशा परिस्थितीत रात्रीच्या वेळी संपूर्ण पाडे अंधारात असल्याने नागरिकांना घराबाहेर पडणेही धोकादायक ठरत आहे. सापदंश, अपघात किंवा इतर आपत्कालीन घटना घडल्यास वेळेवर मदत मिळण्यात अडचणी निर्माण होण्याची भीती व्यक्त केली जात आहे. वीजपुरवठा बंद असल्यामुळे अनेक घरांतील पिण्याच्या पाण्याच्या मोटारी बंद पडल्या असून मोबाईल फोन चार्ज करता येत नसल्याने आपत्कालीन परिस्थितीत संपर्क साधणेही कठीण झाले आहे. आजारी, ज्येष्ठ नागरिक, गर्भवती महिला आणि लहान बालकांना याचा सर्वाधिक फटका बसत असल्याची खंत ग्रामस्थांनी व्यक्त केली. दुसरीकडे शाळकरी विद्यार्थ्यांना रात्री अभ्यास करता येत नसल्याने त्यांच्या शिक्षणावर गंभीर परिणाम होत आहे. एकीकडे पालघर जिल्ह्याला 'चौथी मुंबई' बनविण्याच्या घोषणा केल्या जात असताना, दुसरीकडे ग्रामीण भागातील नागरिकांना वीजेसारख्या मूलभूत सुविधेसाठी संघर्ष करावा लागत असल्याचे वास्तव वंकास परिसरात पाहायला मिळत आहे. या गंभीर समस्येच्या निषेधार्थ वंकास परिसरातील सुमारे १०० ते १५० महिलांनी तलासरी येथील महावितरण कार्यालयावर धडक देत अधिकाऱ्यांना जाब विचारण्याचा प्रयत्न केला. मात्र, सर्व महिलांशी संवाद साधण्याऐवजी अधिकाऱ्यांनी केवळ चार ते पाच महिलांनाच कार्यालयात बोलावून चर्चा केली. या चर्चेत कोणतेही ठोस आश्वासन किंवा निश्चित कालमर्यादा देण्यात आली नसल्याने आंदोलनकर्त्या महिलांमध्ये तीव्र संतापाचे वातावरण निर्माण झाले. महिलांनी तात्काळ वीजपुरवठा पूर्ववत करण्याची मागणी करत, प्रशासनाने यापुढेही दुर्लक्ष केल्यास अधिक तीव्र लोकआंदोलन छेडण्याचा इशारा दिला आहे. पावसाळ्याच्या पार्श्वभूमीवर ही समस्या केवळ गैरसोयीची नसून नागरिकांच्या जीविताशी संबंधित असल्याने महावितरण प्रशासनाने तातडीने दखल घेऊन कायमस्वरूपी उपाययोजना कराव्यात, अशी जोरदार मागणी ग्रामस्थांकडून करण्यात येत आहे.