TINATAWANAN AKO | PSALM 22:6-8

Maraming storya na may nagtawanan at nauwi sa awayan dahil hindi natuwa ang pinagtawanan. Minsan nauuwi sa may nasasawi dahil sa kapikunan ng isang tao, yun pala sa huli malalaman na hindi naman siya ang pinagtatawanan. Isang patunay na may negatibong epekto ang pagtawanan ang isang tao na ang dating ay pangungutya. Kahit sino naman sigurong tao ay magkakaroon ng di magandang reaksyon sa bagay na ito. Ayaw na ayaw nating minamaliit tayo, ayaw nating maramdaman na parang wala tayong kabuluhan. Ayaw na ayaw natin ng hindi tayo niri-respeto. Kasi kahit pa sabihin natin sa sarili nating sino ba naman ako? Ang totoo may pagyayabang naman talaga tayong nakatago dahil makasalanan tayong mga tao at marumi ang nasa puso. Kung aalamin lamang ng tao ang katotohanan, malalaman niya na mismong ang ating Panginoon na kataas-taasan ay kinutya at pinagtawanan ngunit hindi Siya lumaban. Parte iyon ng lahat ng sakripisyong kailangan Niyang tanggapin upang tayo ay magkaroon ng buhay na walang hanggan. Siya ay Diyos na nagkatawang tao subalit dahil sa kahangalan at kamangmangan nating mga tao Siya ay nilapastangan at niyurakan. Wala ni kahit kaunting reklamo o panunumbat na ginawa si Hesus, bagkus niyakap Niya ang buong proseso na ang nasa isip Niya ay pagsunod sa Ama at pagmamahal sa sangkatauhan. Kaya tunay ang pag-ibig Niya para sa iyo at para sa akin, Siya ang sumalo ng parusa na dapat ay sa atin. Siya lamang ang ating Tagapagligtas.