Klan News - Zhurma e motorëve, shqetësim për Tiranën

“Lëvizjet me motor janë kthyer në një shqetësim për banorët e kryeqytetit, pasi herë pas here drejtuesit e tyre lëvizin me shpejtësi tej normave të lejuara dhe krijojnë ndotje akustike”. Tirana vuan nga zhurmat mbi normat e Bashkimit Evropian, jo vetëm nga automjetet, por edhe nga motorët, sportivë, por edhe ata me kubik të ulët që përdoren për shpërndarjen e ushqimeve dhe porosive. Në trafikun e Tiranës, motomjetet përdoren si zgjidhje për të fituar kohë, por modifikimi i disa prej tyre ka shtuar rastet e ankesave në policinë rrugore për shkak të zhurmave që shkaktojnë. Ky fenomen është më i përhapur gjatë orëve të natës, kur qyteti rifiton pak qetësinë nga ditët e ngarkuara me qarkullim. Por motorët janë ata që nuk ndalen as pas orës 12 të natës, duke u kthyer në makth për mijëra banorë. Specialistët shpjegojnë se shumë të apasionuar pas motorëve modifikojnë marmitat jashtë standardeve të kërkuara, duke kaluar kufijtë e lejuar të decibelëve. Policia rrugore e Tiranës është e njohur me këtë shqetësim dhe ka një hartë se cilat janë zonat ku ky fenomen është prezent dhe ku shqetësimet e qytetarëve adresohen më shumë. Pavarësisht se ligji ndalon modifikimin e marmitave, masat ndëshkimore më të aplikuara janë deri në 4 mijë lekë. Megjithatë, ligji parashikon që gjoba maksimale mund të arrijë deri në 40 mijë lekë. Shqetësim janë edhe manovrat e gabuara nga përdoruesit e motorëve, të cilët shpeshherë bëhen shkak për aksidente. Gjatë 6 muajve, nga ana e policisë rrugore, për shkaktim të zhurmave nga këto mjete janë ndëshkuar 228 shoferë, ndërsa për shpejtësi 820 të tjerë. Sipas policisë, mund të bëhen përmirësime në Kodin Rrugor, që mund të ndikojnë në uljen e nivelit të zhurmave nga kjo kategori. Klan News SUBSCRIBE to "RTV KLAN" on YouTube for more videos! Për më shumë informacione vizitoni faqen tonë web https://tvklan.al/kategoria/klan-news/ Follow Klan News on Facebook:   / klannews   Follow @klannews on Instagram:   / tvklannews   #KlanNews #KlanNewsLajme #TvKlan