#spokenwordpoetry PUSONG PAPEL - Isinulat at isinatinig ni Astrild Lee Littérateur (Angela Grace)

#SpokenWordPoetry #TagalogSpokenWordPoetry #PanitikangFilipino #MakatatManunulatNgPanitikangFilipino "Pusong Papel" — Orihinal na isinulat at isinatinig ni Astrild Lee Littérateur (Angela Grace) Sa likod ng sining, sa mga obra mo'y nakatitig, Sa silong ng oras, unti-unti akong pinintig. Wala sa hinagap na ika'y dadating at ako'y iibig, Ako'y may pusong papel—dapat mag-ingat, pero ikaw ang ibig. Sa mga tula mo, ako'y napapatitig, Mga salitang may nais ipahiwatig. Tila mahika ang dala ng iyong pagsasatinig, Nakakapanghalina sa bawat tagapakinig. Saliw sa oras, tadhana'y pinagtagpo tayo. Gumuhit ka sa buhay kong payak at tiyak ang puso. Sa sulat-kolaborasyon, pinagtagpi-tagpi ating arko, Tanikalang rosas, bumigkis sa pusong nasa disyerto. Ikaw ang s'yang pumunit sa pahina kong walang kasaysayan, Pagsinta mo'y 'di ko kayang talikdan. Sa iyong bisig, pagmamahal nais matikman, Maging mga salita mo'y tila patak ng ulan. Kapara ng sa tula, o kuwento, o matematika, Sa bawat wikain o ekwasyon, ikaw ang diwa—ang lohika. Ang sagot na aking matagal nang hinahanap sa aking sistema. Hindi man sigurado, ako'y susubok—susugal ng may pag-asa. Para tayong nakapaloob sa daigdig ng mahika, Sasabay sa agos, nang 'di mapariwara. Buuin natin ang obra't ekwasyon ng magkasama, Magkaibang mundo natin ay pag-anibin nang tayo'y lumigaya. Mananatili akong nagmamahal sa'yo kahit walang hangganan, Tulad ng aking pagtangis sa ilalim ng ulan. Dahil 'di natin hawak ano mang mangyayari sa kinabukasan. Luha man ang kapalit, pinipili pa rin ang umibig dahil puso'y nasisiyahan. — Suportahan po natin ang YouTube Account ni Astrild Lee Littérateur (Angela Grace)    / @astrildlee08