HOTUBA YA ASKOFU LILAKOMA YATOA DIRA YA MIAKA MITANO GEITA

Askofu wa Kanisa la Kipentekoste Tanzania (MMPT) Jimbo la Geita, Askofu Fidosi Lilakoma, amewasilisha hotuba yenye kutoa dira ya maendeleo ya kiutendaji kwa kipindi cha miaka mitano (2026–2031), katika Mkutano Mkuu wa Mwaka wa Jimbo hilo. Mkutano huo umefanyika tarehe 20 hadi 21 Machi 2026 katika Kanisa la MMPT Jerusalem, Katoro, ukihusisha viongozi na wajumbe mbalimbali wa Jimbo la Geita. Katika hotuba yake, Askofu Lilakoma amesisitiza umuhimu wa Kanisa kujiendesha kwa malengo mahsusi ili kuhakikisha linakua kiroho na kiutendaji. Aidha, ameahidi kupambana na migogoro na utengano ndani ya Jimbo, huku akihimiza mshikamano na ushirikiano miongoni mwa viongozi na waumini. Vilevile, amewataka viongozi na wachungaji kulea na kuendeleza vipawa vya waumini badala ya kuvikandamiza, akieleza kuwa vipawa hivyo ni rasilimali muhimu katika ukuaji wa Kanisa. Baadhi ya wajumbe wa Mkutano Mkuu wameeleza kuwa hotuba hiyo imekuwa mwongozo muhimu wa utumishi na uongozi, unaotoa mwelekeo wa maendeleo ya Jimbo kwa miaka mitano ijayo.