ප්‍රදීපාගාරය I Episode 23 I ආන්නා කරෙනිනා I Anna Karenina

මං හිතුවා, ආන්නා කරෙනිනා කෘතිය ගැන කතා කරන්න. මුලින්ම - රුසියන් බසින් උච්චාරණය කරන විදියට අපි 'ආන්නා කරෙනිනා' කියලම උච්චාරණය කලොත් හොඳයි නේද? ඔබ කවුරුත් දන්න විදියට මේ කෘතියේ කතෘ ලියව් තෝල්ස්තෝයි - අද්විතීය රුසියානු ගත්කතු වරයා. අපි මීට කලින් ලියව් තෝල්ස්තෝයි ගැන වැඩසටහනක් මේ නාලිකාවේ කරල තියෙනවා. අවස්ථාවක් ලැබුනොත් ඔබට පුලුවන් ඒකත් බලන්න. පොත පත කියවන ඔබ ආන්නා කරෙනිනා කියවා ඇතෙයි කියල මා විශ්වාස කරනවා. ලෝකයේ තියෙන භාෂා සියල්ලටම වගේ මේ කෘතිය පරිවර්තනය වෙලා තියෙනවා කියන්න පුලුවන්. සිංහල බසිටත් මේ කෘතිය කිහිප වතාවක් පෙරලා තියෙනවා. මොන භාෂාවකින් හෝ මේ පොත කියවිය යුතු පොතක් හැටියටයි - කවුරුත් සලකන්නේ. හේතුව - ආන්නා කරෙනිනා කතාව තුල ඉතාම සිත් ගන්නා සුලු, සිත් ඇද බැඳ තබන කතාන්දරයක් තියෙනවා. ඒ වගේම ඒ කතාවෙන් ඔබ්බට ගියාම මේ කෘතිය තුල ලියව් තෝලස්තෝයි ඒ චරිත විවරණය තුලින් මිනිස් සිත, මිනිස් සිතිවිලි, මිනිස් සම්බන්ධතා විවරණය කරන අපූරුව අප කිසිදා අත් නොවිඳි අත්දැකීමක් ලබා දෙනවා. ඒ අතින් මෙය මනෝවිවරණයක්. සමාජ විවරණයක්. චර්යා ධර්ම පිලිබඳ සාකච්ඡාවක්. මේ සියල්ලටම වැඩිය මේ කෘතියේ තෝල්ස්තෝයි උත්සාහ කරන්නේ ඔහු තම සෑම කෘතියකින්ම උත්සාහ කල අන්දමට ‘ජීවිතයේ අරුත කුමක්ද? ජීවත්වීමේ තේරුම කුමක්ද’ කියන ප්‍රශ්ණයට පිලිතුරු දෙන්න. අන්න ඒ නිසා තමයි දැන් ශත වර්ෂ එකහමාරක් විතර ගත වෙලත්, මේ කෘතිය අදත් අප අතර ජීවත් වෙන්නෙ. අදත් අපි කියවන්නේ. අදත් මේ කෘතිය ඇසුරු කරගෙන සිනමාපට නාට්‍ය නිපදවෙන්නේ.