Bolhai mata mandir, wadebolhai,wagholi, pune, Bolhai mata history, Pujari chi vani,Devastan punetour

वाडे बोलाई हे बोलाईचे पुण्यानजीकचे प्रसिद्ध स्थान. पुणे शहरातही बोलाईचे मंदिर असून, ते जिल्हा परिषद चौकानजीक आहे. पूर्वी या मंदिरामागे तळे होते. इंग्रजांच्या काळात लष्कर विभागास पाणी उपलब्ध व्हावे म्हणून इंग्रजांनी बोलाई मंदिरामागील व गारपीरामागील तळे खोल; तसेच रुंद केल्याच्या नोंदी आहेत. या नोंदींत बोलाई मंदिराचा उल्लेख आढळतो. हे मंदिर त्याही पूर्वीचे आहे. पूर्वापार कसबा पेठेतील जुना काळ व नवा काळ भैरवनाथ या मंदिरांच्या पालख्या सीमोल्लंघनासाठी दसऱ्याला व वार्षिक उत्सव असणाऱ्या चैत्री पौर्णिमेला या देवीच्या दर्शनास आणण्यात येतात. बोलाईचे मंदिर छोटे असून येथे जमिनीलगत तांदळासदृश अशी देवीची मूर्ती आहे. तांदळासदृश असल्याने फक्त चेहरा आहे व त्यावरील भाव प्रसन्न आहेत. देवीसमोर सिंह व जवळ महिषासूरमर्दिनी, खोकलाई, खरजाई, मारुती आदी मूर्ती आहेत. सर्व मूर्ती पाषाणाच्या आहेत. येथील व्यवस्था बघणारे प्रथमेश गिरी यांनी बोलाई हे बोल आई या शब्दांचा अपभ्रंश असून पार्वतीचे रूप आहे असे सांगितले. येथे चैत्रातील व अश्विनातील नवरात्र हे मुख्य उत्सव असतात. नवरात्रात रोज उपवासाच्या पदार्थांचा, तर नवमीला पुरणा-वरणाचा नैवेद्य असतो. अश्विन महिन्यात सर्व रविवार जत्रा असते. एकेकाळी शहर व लष्कर यांच्या वेशीवर असणारा हा भाग सातत्याने बदलत आहे. तळ्याचा आता मागमूसही नाही व गेल्या काही वर्षांत उड्डाणपूल झाल्याने परत येथे मोठे बदल झाले आहेत. सुदैवाने या सर्व बदलात बोलाईचे मंदिर मात्र आहे तिथेच राहिले आहे