Braktisin mësimin nxënësit e shkollës 9 vjeçare "Irakli Bozo" në Golem.

110 nxënës të fshatit Golem nga klasa e parë deri tek e nënta të shkollës 9 vjeçare Irakli Bozo, prej dy vitesh zhvillojnë mësimin në një nga shkollat e qytetit të Lushnjës. Mësimi zhvillohet turni i dytë dhe nxënësve u duhet që të mbërrijnë në shtëpitë e tyre pas mësimit në errësirë të plotë. Autobuzi i caktuar për transportin e nxënësve i çon deri në qendër të fshatit, por ka edhe shtëpi rreth dy kilometër larg dhe prindërit nuk kanë mundësi për ti shoqëruar. Firma ndërtuese për shkollën e re ka të përcaktuar afat 120 ditor për përfundimin e punimeve, por kanë kaluar mbi dy vjet dhe nxënësit vazhdojnë të mos ulen në bankat e shkollës së re. Nxënësit e shkollës dhe prindërit sot kanë protestuar dhe kanë bojkotuar mësimin deri në hapjen e shkollës, duke u kthyer në shtëpitë e tyre. Muharrem Sharka,drejtori i sektorit të arsimit në bashki, nga ana e tij u shpreh se ngërçi do të zgjidhet shumë shpejt.