Барымдаалыг дириг-чурук "Тываның Маадырлары". Анонс.

Экии, чонувус! Тывадан дайынчыларны уттундурбас сактып чоруур сорулгалыг, саналдаарывыс болза “Тываның маадырлары” деп ээлчеглиг, барымдаалыг дамчыдылгалар кылза кандыгыл (цикл документальных фильмов)? Маадыр бүрүзүнүң (күзелдии-биле) дугайында сактыышкын кылдыр эш-өөрү, чаңгысклассчылары, өг-бүлези, кады ажылдап чораан улузу, дөргүл-төрели, башкылары чугаалаар, ооң чер-чуртунга чедип, барып турганы чаштар сады, школазы, чевээнге чедип, шаңнал-макталдарын көргүссе чүл? Бир дириг-чурук-ла 30-40 минут азы 1 шак-даа болгай. Бир эвес чон, маадырларның өг-бүлелери, эштери бо бодалды деткиир болза, бис ону тырттырырынга белен бис. Маадырларның чоок улузу, бир эвес деткип турар болзуңарза, бисче азы адаанга бижипкен болзуңарза. Кожууннар, суурлар чедер орук өртээ, тырттырар бөлүк ажылы, дириг-чурук кезип-чараштаар чарыгдалдарны чон октажыпкай бис. Чылдар ишти артып каар тураскаал ышкажыл. Чаштар өзүп келгеш, келир үеде көрүп болур база аныяктарга патриотчу кижизидилге, чонга чоргаарал. Чүү деп бодаар силер, чонувус? P.S. Бо шуптузу деп чугаалап шыдавас бис. Шаавыс-биле кылдывыс. Частырыглар бар болза, буруудатпаңар. Кирбээн улус бар болза бисче октап көрүңерем! Бирги дугуржуушкун ёзугаар маадырларны мөңгежидер сорулгалыг “Тываның Маадыры” деп ээлчеглиг барымдаалыг дириг-чурукту (цикл, серия документальных фильмов) Монгуш Хуреш Тиил-ооловичиниң чырык адынга тураскаадып кылыр деп шиитпирлээн. Маадырның чоок улузунуң сактыышкыннары, ооң чораан черлери, чер-чурту, ажы-төлү, шаңнал-макталдарын тыва чонга көргүзер 1 шактың видеозу болур. Өөнүң ишти, чоок улузу, дөргүл-төрели дугуржуп, чөпшээрелди берген. Тырттырар ажылдар июнь айның ортан үезинде эгелээр. Деткиир, дузалажыксаар сеткилдиг улуска акша чоргузар агар сан дугаарын айтып каар-дыр бис: Сбербанк картазы 2202 2016 1047 9038. Буян Владимирович С. Улай база 5-6 хире маадырларның чоок улузу база сактыышкынныг дириг-чурук кылыр күзелин илереткен, удавас харылзажып, дугуржуптар боор бис. Тыва черниң ады дээштиң тынын салган оолдарның өг-бүлелеринде маадырының дугайында сактыышкынныг барымдаалыг фильм кылыр күзел бар болза бо бөлүкче бижиптерин диледивис. “ТЫВАНЫҢ АНЫЯК МААДЫРЛАР АЛААГЫ” азы “Аллея молодых героев Тувы”, посвященная героически погибшим участникам СВО на У... - деп төлевилелден база кылып көрээлиңерем, чонувус. Чижээ, “Молодежный Сквер” (азы Национальный Парк-даа болгай-ла) иштинде бир эптиг черге улуг, чараш тураскаал, ында аттарын быжыг демирде оюп, сиилбээн кылдыр. А мурнунда чечектер салыр чер, мурнун плиткалааш, ийи кыдыынга скамейкалардан салып каар. Улус сактыышкын кылып, агаарлап орар кылдыр. Кызылдың мэрияже, Тыва Чазакче бо саналды киирип, черден аңгылап бээр кылдыр билдириишкинден киирер бис, чонувус! 🙏🙏🙏