Сүлдэнд мөнхөрсөн морин эрдэнэ

Хаан төрийн долоон эрдэнийн нэг нь морин эрдэнэ билээ. Төрөө дээдэлдэг монгол хүн бүрийн хийморь цог залийг бадараадаг тэнгэрийн энэ унааг монголчууд бид идээшүүлэн дасгаж, унаж, эдэлж олон зууныг элээжээ. Ялгуусан монголын бахархам түүхийн ээдрээ нугачаа бүрийг морьтойгоо туулсан монгол хүн морио "молор эрдэнэ" хэмээн үнэнхүү зүрх сэтгэлээсээ өргөмжлөн дээдэлдэг билээ. Буурал түүхийн шарласан хуудаснаас эхлэн Монгол улсын хөгжил дэвшлийн даваа нугачаа бүрт монгол хүн монгол морьтойгоо байжээ. Хүлгийн хурдаар, оюуны бядаар, биеийн чадлаараа дэлхийн дайдыг түвшитгэж явсан хийморлог монголчууд шинэ зуунд тал нутгаасаа өндийн байна. Өнөөдөр их спортын дэвжээнээ ч, их театрын тайзнаа ч, эрдэм оюуны талбарт ч морьтон дээдсийн удам монгол залуус дэлхийд дуурсагдан байна. Ажнай хүлгээ сүлдэндээ залсан морьтон монгол билээ бид. Монгол гэдэг нэр ертөнцийн чихнээ дуурсгалтай, Монголын төлөө гэх сэтгэл бидний зүрхэнд уяатай.