Болат Назарбаевқа тиесілі болған жер телімдері мемлекет меншігіне өтті

Бұрынғы президент Нұрсұлтан Әбішұлының інісі Болат Назарбаевқа тиесілі 300 мың гектарға жуық жер телімі мемлекет меншігіне өтті. Қайтарылған алқаптың 239 мың гектары Маңғыстау, 60 мың гектары Жамбыл облысына қарасты жерлер болып отыр. Бұдан бөлек, бас прокуратура Болат Назарбаевтың жалпы аумағы 244 гектар болатын 59 жер телімін заңсыз иеленгенін анықтапты. НҰРБОЛАТ ЖАҢАБЕКҰЛЫ, тілші: – Сыбайлас жемқорлыққа қарсы іс-қимыл жөніндегі қоғамдық кеңес Болат Назарбаевтың компанияларына тиесілі 300 мың гектар ауыл шаруашылығы жерлерін мемлекет меншігіне қайтарды. Бұл туралы кеңес төрағасы Ерлан Саиров мәлімдеді. Оның айтуынша, меншікке өткен жерлердің 239 мың гектары Маңғыстау облысында, 60 мың гектары Жамбыл өңірінде екен. Енді бұл қайтқан атырап соңғы жылдары жайылым жер таппай ұлардай шулаған халыққа үлестірілуге тиіс. Әрі көпшіліктің де тілегі осы. Сондай-ақ, жарты жыл бұрын қоғамдық кеңеске бір топ белсенді Алматы облысындағы заңсыздықтарға байланысты шағым түсіріпті. Онда Болат Назарбаевтың Алматы, Талғар, Астана, Қаскелен және Түркістан өңірлерінде 244 гектар алқапты алып жатқан 59 жер теліміне қатысты мәлімет ұсынылған. Ал кеңес мүшелері арызды нақтылап, бас прокуратураға жолдапты. Құзырлы орган болса, Назарбаевтың көрсетілген жерлердің көп бөлігін заңсыз иеленгенін анықтаған. Қазір бұл алқаптар да мемлекет меншігіне қайтарылып жатыр. Әрі игерілмей не заңсыз берілген жерлерді кері қайтаруға бағытталған жұмыстар мұнымен бітпейді дейді Ерлан Саиров. Айтуынша, енді кісіні тегі де, танысы да, қомақты қаржысы да құтқармайды. ЕРЛАН САИРОВ, «AMANAT» партиясы жанындағы республикалық қоғамдық кеңестің төрағасы: – Қазір Кулибаевқа қатысты, Клебановқа қатысты ну басқа да азулы азаматтарға қатысты біраз материалдар бар. Олардың барлығын қазір біз заңға сәйкес, сәйкес еместігіне сараптама жасап жатырмыз. Сонымен бірге, өздеріңіз білесіздер «Арселор Миттал», «Халық банк», «Жусан» банк бойынша да көптеген қоғамның сұрақтары бар. Міне осылар бойынша да қазір әртүрлі мемлекеттік органдарға сұрау жіберіп жатырмыз. Президент игерілмеген не заңсыз берілген жерлердің жалпы аумағы 10 миллион гектарды құрайды деген еді. Қазір оның 5,2 миллион гектары қайтарылды. Биыл тағы 5 миллион гектар алқап мемлекет меншігіне өтуі қажет. Сол кезде жайылым жер мәселесі толық шешілмек. Ал «жеркарта» геосервисінде Жамбыл облысындағы қайтарылған жерлердің 70 мың гектары Сарысу өңіріне қарасты деп көрсетілген. Маңғыстаудағы алқаптың 171 мың гектары Қарақиян өлкесінің жері болып отыр. Бізді әлеуметтік желіде оқыңыздар: Youtube -   / @informburo31kanal   Facebook -   / informburo31   Instagram -   / informburo31   Vkontakte - https://vk.com/informburo31 TikTok - www.tiktok.com/@informburo31 WhatsApp Информбюро +7 777 331 31 31 #News #Kazakhstan #Жаңалықтар #Біздіңжаңалықтар #Нашиновости #Сегодня #Қазақстан #31канал