Iqbal Academy: Iqbal Day: Int'l Seminar: National Reconstruction & Iqbal: Mr. Tariq Mahmood Mirza

اقبال اکادمی پاکستان اور ایم اے او کالج کے اشتراک سے ’’قومی تعمیر نو اور فکرِ اقبال‘‘ پر بین الاقوامی سیمینار کا انعقاد مفکرِ پاکستان علامہ محمد اقبال کے۸۸ویں یومِ وفات کی مناسبت سے اقبال اکادمی پاکستان اور گورنمنٹ ایم اے او گریجویٹ کالج، لاہور کے باہمی اشتراک سے’’قومی تعمیر نو اور فکرِ اقبال‘‘کے عنوان سے ایک پروقار بین الاقوامی سیمینار کا انعقاد کیا گیا۔ سیمینار کی مہمانِ خصوصی پرنسپل گورنمنٹ ایم اے او گریجویٹ کالج لاہور پروفیسر ڈاکٹر عالیہ رحمن خان تھیں۔ ڈائریکٹر اقبال اکادمی پاکستان ڈاکٹر عبدالرؤف رفیقی نے کلمات تشکر پیش کیے۔ بین الاقوامی سیمینار میں مختلف ممالک سے تعلق رکھنے والے سکالرز معروف ماہر اقبالیات ڈاکٹر تقی عابدی (کینیڈا)، پاکستانی سفیر برائے اسپین ڈاکٹر ظہوراحمد، معروف صحافی و مصنف ڈاکٹر سمیع اللہ(برطانیہ)اور پاکستان کویت فرینڈشپ ایسوسی ایشن کے صدر رانا اعجاز حسین نے آن لائن اپنے مقالے اور خیالات پیش کیے ۔ صدر شعبہ اُردو ڈاکٹر آصف علی چٹھہ اور ڈاکٹر امجد علی بھٹی مہمان مقررین میں شامل تھے۔ نظامت کے فرائض جناب داؤد حسین نے انجام دئیے۔ تقریب سے خطاب کرتے ہوئے مقررین کا کہنا تھا کہ پاکستان کو درپیش چیلنجز کا حل علامہ اقبال کے بتائے ہوئے اصولوں میں پنہاں ہے۔ قومی تعمیرِ نو کے لیے اقبال کے شاہین صفت نوجوانوں کو متحرک ہونا پڑے گا اور ان کے افکارِ تازہ سے رہنمائی حاصل کرنی ہوگی۔ تقریب کے اختتام پر ڈائریکٹر اقبال اکادمی ڈاکٹر عبد الرؤف رفیقی نے تمام شرکاء اور مہمانوں کا شکریہ ادا کیا اور اس عزم کا اظہار کیا کہ اقبال اکادمی، تعلیمی اداروں کے ساتھ مل کر پیغامِ اقبال کو عام کرنے کی کوششیں جاری رکھے گی۔ سیمینار میں اساتذہ اور طلبہ کی بڑی تعداد نے شرکت کی۔