ཉེ་ཆར་ཐེ་ཝན་སྲིད་འཛིན་གྱི་གཟིགས་སྐོར་ཐད་དབྱེ་ཞིབ། དེབ་གསར་༼ཨ་ཁུ་ཋོམ་གྱི་ཤིང་ཁང་༽འོས་སྦྱོར།

2026-05-08 བོད་ཀྱི་གསར་འགྱུར། བོད་ནང་གི་གསར་འགྱུར། ༡)བོད་རང་སྐྱོང་ལྗོངས་ཟེར་བའི་གཞིས་ཀ་རྩེའི་རྫོང་ཁག་ཅིག་ནང་མི་རིགས་མཐུན་སྒྲིལ་ཡར་ཐོན་སློབ་གསོའི་རྟེན་གཞི་ཟེར་བ་བཙུགས་ནས་མི་རིགས་མཐུན་སྒྲིལ་དྲིལ་བསྒྲགས་སློབ་གསོ་སྤེལ་བཞིན་པ་རེད། ༢)བོད་ཀྱི་གོ་འཇོ་རྫོང་གི་ཁྱིམ་ཚང་བརྒྱ་ཙམ་ལས་མེད་པའི་གྲོང་ཚོ་ཆུང་ཆུང་ཞིག་ཏུསློབ་ཆེན་ནས་ཐོན་པའི་སློབ་མ་༡༡༢བྱུང་ཡོད་པ་རེད། ༣)བོད་ཀྱི་ལྷ་ས་གྲོང་ཁྱེར་གྱི་གྲོང་ཁྱེར་སྤྱི་ཁྱབ་པ་གཞོན་པ་དགྲ་འདུལ་ལ་སྒྲིག་འགལ་ཁྲིམས་འགལ་གྱི་མིང་ཐོག་ནས་ཞིབ་བཤེར་བྱེད་བཞིན་པ་རེད། བཙན་བྱོལ་བོད་ཀྱི་གསར་འགྱུར། ༡) མི་འགྱངས་པར་༧གོང་ས་རྒྱལ་བ་རིན་པོ་ཆེ་མཆོག་དབུ་བཞུགས་ཐོག་ཡང་བསྐྱར་སྲིད་སྐྱོང་དུ་བདམས་ཐོན་བྱུང་བའི་སྤེན་པ་ཚེ་རིང་མཆོག་གི་སྲིད་སྐྱོང་ལས་འཁུར་དམ་འབུལ་ཞུ་རྒྱུ་རེད། ༢)༧གོང་ས་རྒྱལ་བ་རིན་པོ་ཆེ་མཆོག་གི་༧སྐུའི་ཡང་སྲིད་ངོས་འཛིན་ཐད་གཞུང་ལ་ཐེ་བྱུས་ཀྱི་དབང་ཆ་མེད་པའི་སྐོར་ཡུ་རོབ་མཐུན་ཚོགས་ཀྱིས་ལངས་ཕྱོགས་གསལ་འདོན་གནང་བ། ༣) ཨོ་གླིང་སྐུ་ཚབ་དོན་གཅོད་ཀྱིས་ཨོ་གླིང་ནང་འགྲོ་བ་མིའི་ཐོབ་ཐང་ལྟ་ཞིབ་ཁང་གི་འགན་འཛིན་དང་ཐུག་འཕྲད་ཀྱིས་མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་ཡིག་ལ་སེམས་འཚབ་ཡོད་པ་གསུང་འདུག ༤)བཙན་བྱོལ་བོད་མིའི་ཆེས་མཐོ་ཁྲིམས་ཁང་གིས་བལ་ཡུལ་མཆོད་འཇོར་ས་གནས་མི་མང་གི་ཁྲིམས་གཏུག་ཁ་མཆུར་ངོས་བཞེས་གནང་འདུག རྒྱལ་སྤྱིའི་གསར་འགྱུར། ༡)རྒྱ་ནག་གི་རྒྱལ་སྲུང་བློན་ཆེན་ཟུར་བ་གཉིས་ལ་སོ་སོར་ལོ་གཉིས་ཕྱིར་འགྱངས་ཀྱི་སྲོག་ཁྲིམས་བཅད་འདུག ༢)ཨ་རི་དང་ཨས་རན་བར་མུ་མཐུད་དུ་གྲོས་མོལ་བྱེད་བཞིན་པ་དང་བདུན་ཕྲག་དགུའི་རིང་གི་དཀྱིལ་ཤར་གདོང་གཏུག་ལ་འབྲས་བུ་ཐོན་པའི་རེ་བ་བྱེད་བཞིན་འདུག དཔྱད་གཏམ། དེ་རིང་གི་དཔྱད་གཏམ་ལེ་ཚན་ནང་དུ་ཉེ་ཆར་ཐེ་ཝན་གྱིས་ཕྱི་སྲིད་ཐད་རྒྱ་ནག་གི་གནོན་ཤུགས་ལ་མགོ་མ་སྒུར་བར་སྲིད་འཛིན་ལེ་ཆིན་ཏི་ཡིས་ཨ་ཧྥུ་རི་ཀའི་རྒྱལ་ཁབ་ཨས་སི་ཝ་ཊིས་ནཱི(Eswatini)ནང་གི་གཟིགས་སྐོར་ལེགས་འགྲུབ་བྱུང་བའི་གལ་ཆེན་རང་བཞིན་ཐད་དབྱེ་ཞིབ་བྱས་ཡོད། རྩོམ་རིག དེ་རིང་གི་རྩོམ་རིག་ལེ་ཚན་ནང་དུ་ཉེ་ཆར་ལ་རྩེའི་ལས་གཞིའི་ལས་ཁང་གིས་འགྱུར་བརྒྱ་རྩ་བརྒྱད་གྲས་སུ་དཔར་སྐྲུན་གནང་བའི་ལོ་ཙཱ་བ་རྡོ་རྗེ་ཚེ་བརྟན་གྱིས་དབྱིན་ཡིག་ནས་བོད་ཡིག་ནང་བསྒྱུར་བའི་འཛམ་གླིང་གི་སྒྲུང་རྩོམ་སྐད་གྲགས་ཅན༼ཨ་ཁུ་ཋོམ་གྱི་ཤིང་ཁང་༽ཞེས་པ་དེ་འོས་སྦྱོར་བྱས་ཡོད།