نم يا فمي ليهم بشكر الاحرار - الشيخ عبدالله الحبر

نم يا فَمي ليهم بشكِر الأحرار صديق والفاروق عثمان علي الكرار ** يا أهل العقول لا تَتيعوا الأغرار صُدوا عن المعاصي وأنبذوا الإصرار تبقي أسماءكم في دفتر الأبرار ويكُف عنكُمُ البلواتِ والأشرار والكك وأب إديًّه وأيضاً أب فَرار ويَصُب فوقكم رحماتو كالمِدرار حاجات النفوس تُقضى بِلا استجرار ** إن رمتُم صلاة أحمد حسيب الجارْ أب قولاً مُصَدَق لا أسا ولا جارْ أب طبعاً رقيقاً حالي خالي كِجارْ أب خُلقاً عَظيم لم تعتري أضجارْ أب قلباً رحيم كم كم أغاث وأجارْ أب قامةً تُظلِلْ هامتها الأشجارْ أب وجهاً يضوي الحالِك الديجارْ أب كفاً كريم طافي الوقوده حِجار ْ أب جاهاً يحِل ذو الفَّده والسَّجارْ ** يا نِعمْ الصديق الصدَّق أقوالو آوى وآزروا وأنفَقْ علي اموالو آنَس وحشتو وإتفقَد أحوالو حباهُ وحَمَا مِن العِدا الوالو في الغار هو الرفيق مَن يهوى يهوالو في الفضل السبيق مِن تاني يسوالو شَجاعاً تقي والصبرِ منوالو العُوق أب تلي هايبين لِقا أطوالو يوم جمع الخصوم وراهُم أهوالو وأشبَع للمُهند فيهِم وأروالو أب ضرباً يشِق الزول وسروالو أب زِنداً قوي ما الجوع بيتوالو بارى المصطفى والمولى سوالو والى الأمرِ بعدو ودِينو قوى لو ** مَرحبتين حَباب أبي حَفصة سَيدي عُمر مَرحَبتين حباب عُمر النَهى وأمَر مَرحَبتين عُمر الدِين بيوتو عَمر مَرحبتين عُمر فارساً لِقاهُ أمَر مَرحبتين عُمَر في الحربِ صَال وجَمَر مَرحَبتين عُمر كَم أفنا أفنا زُمَر مَرحَبتين عُمر كم كَّف كَّف عُمر مَرحبتين عُمر حَطب الكُفُر بالمَر مَرحبتين عُمر سيفو اروابو دَم أحمر كفى الطائِرات كِبده وكَلاوي عُمَر رضي اللهُ عَنهُ الفِ ألفي مَر ** مرحبتين حباب زين الحِبر عُثمان أب قلباً خَشوع نَّيِر مَلان إيمان أب عيناً عليها النوم دوام حَرمان أب فماً تلى الآي وَقَّف الأثمان أب كفاً كريم كَم كَم غنى عَدمان ألمِنهُ أستحوا أملاك العلي الرحمن حين شَّد ورِكِب وإتيامن القرمان خلا المشرِكين راقدين رُزم كِيمان شتت شملهُم شِل جُملة الأيمان فَّرق جَمعهُم جاب الأسير نَدمان كُر يا عين دَقُر، سَيدي عُثمان رضي اللهُ عَنهُ لا مَدى الأزمان ** وين زوجْ البَتول مرحَب بِهِ ألِفاً أسداً في الأسود مِنهُ الوجوه كُفن حَيدرةَ الذي بالنصرِ مُلتفاً كُر مِنو ودَقُر يا عيونا إنكَفن كَرار ام لَبوس الروقن صَّفن بَرَّز في المحاص فوق البِقِلب الفَنْ شايل ذا الفِقار الواسى لي العَفَّن أب ضرباً مُخَّلِص يالهُ مِن كَفَّاً فَّل المُشرِكين جَّدع رؤوسهم فَّنْ خلاهُم قناطِر والدِما بَفَّاً وأصناف الطِيور في كِلاهُم إتكَفن زَّف الباقِيين مِتل الغنَم زفاً باكيات أعيُنُمْ دماعا ما جَّفنْ وأفواهُم يمين مِن التُراب سَفَن ولوا مُدبِرين راحاتُم إتحَفَّن زايغين القلوب وأكبادهم إنتَفَّن مِن تَعَب الظما أرواحُم إتقَّفن ماتوا بالكَمَد حَلالُم إصَفَّن ونِساهُم تَنوح بل ضارِبات دُفاً نيران أم جَحيم ذيك داخله في حَلفاً إن كَجَّنَهُم زِين فِيهُم إشَّفن لا أبدْ الأبَد لا خروج ولا خِفاً ** مرحَبتين حَباب السِتة والعَمين والسِبطين كِرام الآبا والأُمين والآل والصحابة اللي العُمُر سايمين جاهدوا للنفوس رُكن الشِرِك هادمين يمشوا الحق قَبَلْ ما قالوا مُنبرمِين حِين سِمعوا النِحاس هُم فوقو مُترامين فوق الصافنات مِتل الجِبال سامين فرسان اللِقا البِحمل لِقاهُم مِين في الباس هُم شُداد جيش الألوف هازمين رُوس الكافرين بالمُرهِفات حاسمين أفنوهُم سِنين لا عام ولا عامين أبقوهُم رِمم مِن العَفن وارمين والمأسور كَتير والزازى بالقَدَمين والمجروح إنين لا يوم ولا يومين الهَجروا الطعام والشُربِ مُتباومين مِن ضرب الثِقاة البي الشمال ويَمِين باغضين الحياة وحياةْ نَبي الحَرَمين ** الليلة الحِجاز بَراقو جاي لَمَعَن هَيجَن الغرام زادن علي وجَعْن ودعني الكَرى والمُقلتين هَمَعن طَّرني المَناسِك والمحادي ظَعَن والبيت وأرجُلاً حامن بِحولو سَعن وأفواهاً يلَبَّنْ تارة تارة دَعَنْ والحُجرة أم رياض مَولوع بِها ولَعاً مهما الليلِ جَّنَ روحي وقِليبي نَعَن ما دام في الوَطَن أقوالي ما انسمَعَن واحسرة شبابي اللي الذنوب مَنَعَن وا أسفي إن أقيم وأقدامي ما نَجَعَن لي قبراً عقارِب حُبو لي لَسَعَن إن كان أبقى حي ما تظنوا في نَفعاً ** الصَلوات حياتي الفاه بِها فَاهو تَغني وتَقضي دَينو وفقرو تَنفاهُو تحمي وتَسْتُرو وفي الضِيقة تَلفاهو تهدي بل تَقي لو وذنبو تَعْفاهو تفتَح عين بَصِيرتو وداهُو تَشفاهو تكشِف غُمَتو وتكفي اللِشايفاهو في كِلتا الديار قامَت بِمُوفاهو في قصور سور أمانا السامي كانفاهو بي خِلَعْ القَبول والنصرِ لافاهو فوق رُتَب العُلا والشَّان ملاطفاهو بالهَنا والسرور خيراتا حافاهو والهَم المُخَّوف مِنو صارفاهو يوم الإحتياج جاه سيدا كافاهو كافى احِبتو النفوسا مالفاهو والضِد بالعَكِس الهاوية خاتفاهو في طبق اسفلَ تكفاهو تكفاهو