Səfər | Göyçay rayon M.Məmmədov adına Potu kənd tam orta məktəbi | KİE 🇦🇿

"Kitablarla inkişaf edək" layihəsi kənd məktəblərinə kitab göndərmək üçün 31 May 2018-ci ildə yaradılmışdır. Layihənin əsas məqsədi maarifçilik, vətənpərvərlik və vətəndaş cəmiyyətinin yaradılmasıdır. Mövcudu dəyişmək çətin, bəzənsə mümkünsüzdür deyə düşündüyümüz üçün yola məktəblərdən çıxdıq və şagirdlərin düzgün, insani dəyərlərlə formalaşması üçün ucqar kənd məktəblərində yorulmadan çalışan müəllimlərlə əl-ələ vermişik. Layihə bu günə kimi 114 kənd məktəbi və məntəqədə tətbiq edilmiş və 6000-dən çox bədii kitab məktəblərə uşaqların oxuması üçün göndərilmişdir. Hazırda aktiv əməkdaşlıq etdiyimiz 70 müəllim var ki, hər biri Azərbaycanın çiçəklənməsi və şagirdlərinin inkişafı üçün yorulmadan çalışan çox dəyərli və Azərbaycan müəllimləri içərisində öz peşələrinə sevgiləri ilə seçilən müəllimlərdir və bizim üçün onlarla birlikdə vətənimizin inkişafı üçün çalışmaq çox böyük qürurdur. Arzu edirik ki, gələcək dövrlərdə istər bizimlə, istərsə də fərdi şəkildə şagirdlərin inkişafı üçün usanmadan çalışan və müəllimlik peşəsini ucaldan əsl müəllimlərimizin sayı artar, ki cəmiyyətin təməlinin düzgün qoyulmasında bəlkə də ən birinci rolu müəllimlər oynayır. Sizləri də bizimlə birlikdə bu günümüz və sabahımız üçün çalışmağa səsləyirik 😊🌻. Gəlin birləşək və işıqlı gələcək üçün birlikdə çalışaq 🇦🇿. Biz bir olanda Azərbaycan oluruq 🇦🇿. Layihəyə kitablarla, maddi yardımla, layihəni paylaşaraq və ətrafınızda təbliğ edərək, eləcə də ucqar kənd məktəblərində müəllim kimi fəaliyyət göstərən müəllimləri layihə ilə əməkdaşlığa səsləyərək dəstək ola bilərsiniz 🌻. Biz vətənimiz olan Azərbaycanı sevir və onun inkişafı üçün hər daim çalışmağa hazırıq. "Bəyaz zanbaqlar ölkəsində" kitabından aşağıdakı sitatı özümüz üçün rəhbər seçərək: "Vətən üçün yaşamaq onun inkişafı üçün çalışmaq onun uğrunda ölmək qədər şərəflidir".