Foliada dos Cacharreiros en Niñodaguia

Santa María de Niñodaguia é unha parroquia do concello de Xunqueira de Espadanedo, situada a carón da serra de San Mamede e regada polo río Niñodaguia, do que recibe o seu nome. Dende séculos, nestes lugares aproveitan o barro do Monte do Barro para fabricar “cacharros” (olas, pratos, xerras...). Media ducia de artesáns manteñen viva a produción oleira tradicional caracterizada pola súa cor amarela, froito do barro que empregan e do esmaltado que reciben as pezas. Coa posta en marcha do Museo-Taller “Alfarería de Niñodaguia”, no ano 2016, comezouse a divulgar este tradicional oficio. A produción de cerámica en Galicia data do Neolítico e mantense naqueles lugares onde existe a materia prima, aínda que na actualidade de xeito moi residual ,posto que os novos envases substituíron as olas e cacharros tradicionais. No século XIX, o Dicionario Madoz infórmanos da produción industrial de “panos ordinarios de liño” e tamén de louza basta. Ao xeógrafo chámalle a atención o gran número de homes dedicados ao oficio de cordeleiros e cedaceiros, aínda que tendo en conta que os cribos e peneiras son imprescindibles para o peneirado do barro, era lóxico que os homes soubesen fabricar estes utensilios. Por estas datas, arredor de 1850, os produtos xa se vendían nas feiras, como a de Maceda, o día 20 de cada mes. #etnografía #documental #galicia #folklore #ceramica #festa #artesanía