KIONGOZI MBIO ZA MWENGE WA UHURU AKOSHWA NA MRADI WA WODI MAALUM YA WAGONJWA HOSPITALI YA MKOMAINDO

Kiongozi wa Mbio za Mwenge wa Uhuru Kitaifa 2026, Ndg. Wazo Michael Mwang’onda amekoshwa na mradi wa ujenzi wa wodi maalum ya wagonjwa (VIP) katika Hospitali ya Mkomaindo. Mradi huu utagharimu jumla ya Tsh 170,136,516.79 hadi kukamilika kwake ambazo zote zitatoka katika mapato ya ndani ya Halmashauri. “Mradi huu ni wa kujivunia sana kwa sababu kutakua na huduma maalum kwa wananchi wa Masasi na maeneo ya jirani. Niashukuru sana Serikali kwa mradi huu ambao ni mfano wa kuigwa kwa Ukanda wa Kusini. Nampongeza Mkurugenzi wa Halmashauri Pamoja na Mganga Mkuu wa Halmashauri kwa usimamizi wao thabiti ambao umeleta ubora huu”, alisema Ndg. Mwang’onda na kuongeza; “Niwaombe tuendelee kulinda amani yetu na mshikamano ili tuwe na mazingira mazuri na wezeshi ya kujenga miradi kama hii nchi nzima”. Naye Mkuu wa Mkoa wa Mtwara, Kanali Donald Msengi alisema ujenzi wa wodi hiyo ni mkakati madhubuti wa Serikali kuendelea kuboresha sekta ya afya. “Niwapongeze sana wana Masasi kwa mradi huu wa kipekee, sekta ya afya ni eneo muhimu ambalo Serikali ya Awamu ya Sita imeendelea kutilia mkazo na uwepo wa miradi hii ni kiashiria cha muendelezo wa juhudi za kuboresha huduma za afya nchini”, alisema Mhe. Kanali Msengi. Naye Mganga Mkuu wa Halmashauri ya Mji Masasi Dkt. Rosemary Mushi alisema; “Mradi huu una unalenga kuboresha utoaji wa huduma za afya kwa wagonjwa wanaolazwa hospitalini kwa kuwezesha uwepo wa wodi nzuri ya kisasa na yenye hadhi, kuongeza mapato ya hospitali na Halmashauri kwa ujumla na kuwaondolea adha wananchi ya kufuata huduma hiyo katika hospitali zilizo mbali”.