რევაზ სოხაძე-საგანმანათლებლო ინფრასტრუქტურული პრობლემების გადასაჭრელად მუშაობას ვაგრძელებთ

„დღეს, განათლების მინისტრთან ერთად, ვიმყოფებოდით თბილისის რამდენიმე სკოლაში, სადაც მოსახლეობას აწუხებს სკოლების მშენებლობასთან დაკავშირებული საკითხები. ოპერატიულად მივიღეთ ყველა საჭირო გადაწყვეტილება აღნიშნული პრობლემების მოსაგვარებლად. ეს ეხება როგორც ნაძალადევის რაიონს, ასევე დიდ დიღომს, სადაც სასკოლო ინფრასტრუქტურის გამოწვევები განსაკუთრებით მწვავედ დგას“ - აღნიშნა მინისტრმა სკოლების დათვალიერების შემდეგ. ინფრასტრუქტურის მინისტრი რევაზ სოხაძე და განათლების, მეცნიერებისა და ახალგაზრდობის მინისტრი გივი მიქანაძე ადგილზე გაეცნენ თბილისში ოთხი საჯარო სკოლის მიმდინარე სარეაბილიტაციო და სამშენებლო პროცესს, ასევე არსებულ საჭიროებებს. მინისტრებმა დაათვალიერეს ნაძალადევის რაიონში მდებარე №10 საჯარო სკოლის მშენებლობა, რომელიც აქტიურად მიმდინარეობს. უკვე დასრულებულია შენობის პირველი კორპუსი, ამ ეტაპზე კი გარე ფასადის და შიდა მოპირკეთების სამუშაოები მიმდინარეობს. ახალი სკოლა, რომელიც 650 მოსწავლეზე იქნება გათვლილი, თანამედროვე სტანდარტების შესაბამისად აშენდება და უზრუნველყოფს უსაფრთხო და კომფორტულ სასწავლო გარემოს. თბილისის №133 საჯარო სკოლაში, მოსწავლეთა მზარდი რაოდენობის გათვალისწინებით, მიღებულია გადაწყვეტილება დამატებითი ფლიგელის მშენებლობის შესახებ. ახალი სივრცე მნიშვნელოვნად გააუმჯობესებს სასწავლო პროცესის ხარისხს. ასევე გადაწყდა, რომ საბურთალოს რაიონში მდებარე №158 საჯარო სკოლის ნაცვლად აშენდება ახალი, თანამედროვე სტანდარტების შესაბამისი შენობა, რომელიც 1000 მოსწავლეზე იქნება გათვლილი. არსებული ინფრასტრუქტურა ვერ აკმაყოფილებს მოთხოვნებს და საჭიროებების სრულად დაკმაყოფილებას დამატებითი ფლიგელის მშენებლობაც ვერ უზრუნველყოფს. რევაზ სოხაძემ და გივი მიქანაძემ განსაზღვრეს კონკრეტული ნაბიჯები პროექტების დაჩქარებისა და სამუშაოების ეფექტიანად განხორციელებისთვის, რათა პროცესი შეუფერხებლად გაგრძელდეს. პროექტები ინფრასტრუქტურის სამინისტროს მუნიციპალური განვითარების ფონდს განათლების სამინისტროს შესაბამისი სააგენტოს გაუქმების შემდეგ გადაეცა. მინისტრებმა, საკრებულოს დეპუტატებთან, რაიონების გამგებლებთან და მერიის წარმომადგენლებთან ერთად, დეტალურად განიხილეს სკოლების მშენებლობისა და რეაბილიტაციის პროცესში არსებული გამოწვევები და მათი გადაჭრის გზები. „ვფიქრობთ, მიღებული გადაწყვეტილებები დადებითად აისახება აღნიშნულ ტერიტორიებზე სასკოლო ინფრასტრუქტურის გაუმჯობესებაზე. პროაქტიულად გავაგრძელებთ მუშაობას, რათა პრობლემები მაქსიმალურად მოკლე ვადებში გადაიჭრას და ბავშვებს მიეცეთ შესაძლებლობა, სწავლა გააგრძელონ თანამედროვე სტანდარტების შესაბამის გარემოში“ - განაცხადა რევაზ სოხაძემ.