Ana Iglesias Álvarez. A temeridade sálvanos de senti-la covardía - Simposio Xela Arias

Ana Iglesias ofreceu a súa propia visión persoal de Xela Arias baseada nunha amizade que fraguou nos anos en que foron compañeiras de estudos na universidade, centrándose nas decisións que a escritora foi tomando ao longo da súa vida “de forma máis temeraria ca precavida”. Escolleu, de feito, un dos versos de Intempériome, “A temeridade sálvanos de senti-la covardía”, para dar título á súa intervención. A Real Academia Galega continuou a celebrar as Letras Galegas de Xela Arias durante o mes de novembro con tres xornadas dedicadas á súa figura e obra. O Simposio Xela Arias, que tivo lugar os días 11, 18 e 25 na sede da institución (rúa Tabernas, 11 – A Coruña), concibiuse como un punto de encontro para profundar na análise da escrita, a tradución e o labor de edición da autora e tamén gozar da súa creación a través da palabra recitada, a música e o audiovisual.