မူကြိုကျောင်း ပစ်ခတ်မှုကြောင့် ထိခိုက်နစ်နာသူတွေကို သွားတွေ့မယ့် ထိုင်းဘုရင်

မူကြိုကျောင်း ပစ်ခတ်မှုကြောင့် ထိခိုက်နစ်နာသူတွေကို သွားတွေ့မယ့် ထိုင်းဘုရင် ထိုင်းဘုရင်နဲ့ မိဖုရားတို့ဟာ သေနတ်သမား တစ်ဦး ပစ်ခတ်မှုကြောင့် လူ ၄၀ နီးပါး သေဆုံးခဲ့တဲ့ မူကြိုကျောင်း ပစ်ခတ်မှုကြီးကြောင့် ထိခိုက်နစ်နာသူတွေကို သွားရောက် တွေ့ဆုံမှာ ဖြစ်ပါတယ်။ အောက်တိုဘာ ၇ ရက် ညပိုင်းမှာ ဘုရင်ကြီး မဟာ ဗီဂျရာလောင်ကွန်းနဲ့ မိဖုရား စုသီဒါတို့ဟာ နိုင်ငံ အရှေ့မြောက်ပိုင်းက နွမ်ဘူရာလမ်ဖူ ဒေသကို သွားရောက်ပြီး ဆေးရုံနှစ်ခုမှာ တက်ရောက် ကုသနေသူတွေကို တွေ့ဆုံ အားပေးမှာ ဖြစ်ပါတယ်။ ပြီးတော့ အခင်းဖြစ်ပွားရာ မူကြိုကျောင်းမှာလည်း ကော်ဇောနီတွေ ခင်းကျင်း ပြင်ဆင်နေတာကို တွေ့ရပါတယ်။ ထိုင်းဘုရင်နဲ့အတူ ဝန်ကြီးချုပ် ပယာရွတ်သ် ချန်အိုချာလည်း လိုက်ပါလိမ့်မယ်လို့ အစိုးရ ပြောရေးဆိုခွင့် အရာရှိ တစ်ဦးက ပြောပါတယ်။ ထိုင်းဘုရင်ဟာ ထိခိုက်ဒဏ်ရာရသူတွေရဲ့ ဆေးဖိုးဝါးခ ကုန်ကျစရိတ်တွေနဲ့ သေဆုံးသူတွေအတွက် နာရေးစရိတ်တွေကို ထောက်ပံ့ လှူဒါန်းသွားမယ်လို့လည်း သိရပါတယ်။ ထိုင်းနိုင်ငံဟာ ခေတ်သစ် နိုင်ငံသမိုင်းကြောင်းမှာ အဆိုးရွားဆုံး အစုလိုက် အပြုံလိုက် သတ်ဖြတ်မှုကြီး တစ်ခုနဲ့ ကြုံတွေ့ခဲ့ရပါတယ်။ ထိုင်းအစိုးရက ဒီဖြစ်စဉ်အပေါ် ဝမ်းနည်းကြေကွဲမှု ပြသတဲ့ အနေနဲ့ အစိုးရ ရုံးတွေမှာ အလံတွေကို တိုင်တစ်ဝက် လွှင့်ထူထားစေခဲ့ပါတယ်။ အောက်တိုဘာ ၆ ရက်က စိတ်အခြေအနေ ပုံမှန် မဟုတ်ဘူးလို့ ယုံကြည်ရတဲ့ ရဲအရာရှိဟောင်း ပန်ညာ ခမ်ရက်ဘ်ဟာ သူ့ရဲ့ သားဖြစ်သူ တက်ရောက်နေတဲ့ မူကြိုကျောင်းထဲ သေနတ်နဲ့ ဝင်ပစ်ခဲ့သလို ဓားနဲ့ပါ ရမ်းကား တိုက်ခိုက်ခဲ့ပါတယ်။ သူ့ရဲ့ ကလေးက မူကြိုမှာ ရှိမနေခဲ့ပါဘူး။ နောက်တော့ အသက် ၃၄ နှစ်အရွယ် တရားခံဟာ အိမ်ကို ပြန်သွားပြီး ဇနီးနဲ့ ၂ နှစ်အရွယ် သားတို့ကို သတ်ပစ်ခဲ့သလို ကိုယ့်ကိုယ်ကိုယ်ပါ အဆုံးစီရင်သွားခဲ့ပါတယ်။ သူ့လက်ချက်ကြောင့် ကလေး အများစု အပါအဝင် လူ ၃၇ ဦး သေဆုံးခဲ့ပါတယ်။ ပန်ညာဟာ ရဲတပ်ကြပ်ဟောင်း တစ်ဦးဖြစ်ပြီး မူးယစ်ဆေးဝါး သုံးစွဲမှုကြောင့် နှစ်ဆန်းပိုင်း ကတည်းက ရာထူးက ဆိုင်းငံ့ ခံထားရတာပါ။ သူဟာ အခင်းဖြစ်တဲ့နေ့က မူးယစ်ဆေးဝါးမှုအတွက် တရားရုံးမှာ သွားရောက် လျှောက်လဲခဲ့ရပြီး အပြန်မှာ မူကြိုကျောင်းကို သွားရောက်ခဲ့တာ ဖြစ်ပါတယ်။ ထိုင်းနိုင်ငံမှာ လက်နက် ကိုင်ဆောင်ခွင့် ဥပဒေတွေက တင်းကျပ်ပြီး တရားမဝင် သေနတ်ကိုင်သူဟာ ထောင် ၁၀ နှစ်ထိ ကျခံရနိုင်ပါတယ်။ ထိုင်းမှာ ပစ်ခတ်မှုကြောင့် အစုလိုက် သေကြေတဲ့ မှုခင်းမျိုးက ရှားပါးပေမယ့် ၂၀၂၀ ပြည့်နှစ်တုန်းကတော့ ဒေါသပေါက်ကွဲနေတဲ့ စစ်သားတစ်ယောက်ရဲ့ ရမ်းကား ပစ်ခတ်မှုကြောင့် လူ ၂၉ ဦးသေပြီး ၅၇ ဦးဒဏ်ရာရတဲ့ ဖြစ်စဉ်မျိုး ကြုံတွေ့ခဲ့ဖူးပါတယ်။