MWANAFUNZI AJIFUNGUA CHOONI TABORA-RC CHACHA ACHARUKA

Mkuu wa mkoa wa Tabora, Paul Chacha ameagiza kukamatwa kwa Bodaboda aliyempa mimba mwanafunzi wa shule ya sekondari Tabora Wasichana (Tabora girls), kuhamishwa kwa walimu wenye miaka zaidi ya 10 katika shule hiyo na kuchunguzwa kwa Daktari aliyemfanyia vipimo mwanafunzi huyo aliyejifungulia chooni. Awali Katibu tawala wa mkoa wa Tabora Dkt. John Mboya alisema tukio hilo limetokea mwezi February mwaka huu katika choo cha hospitali ya Rufaa ya mkoa wa Tabora-Kitete wakati mwanafunzi huyo alipoenda kupata matibabu. Mboya amesema baada ya kufika hospitali hapo mwanafunzi huyo aliomba kwenda kujisaidia chooni na ndipo alipojifungua na kukitelekeza kichanga chooni. Baadae wananchi wengine waliopita karibu na choo walisikia sauti ya kichanga na kukiokota. Baada ya uchunguzi ilibainika mwanafunzi huyo alijifungua na kumtelekeza huko na juhudi za madaktari zilinusuru maisha ya mtoto huyo. Mkuu wa mkoa wa Tabora, Chacha amesema haingii akilini mwanafunzi kuishi na hali ya ujauzito kwa miezi 9 shuleni bila walimu kugundua suala hilo nakuagiza hatua za kinidhamu zichukuliwe ikiwa ni pamoja na kuhamishwa kwa walimu waliokaa shuleni hapo kwa zaidi ya miaka10.