ചിനക്കത്തൂർ പൂരം ഡോക്യുമെൻ്ററി - CHINAKKATHOOR POORAM DOCUMENTARY

പൂർവ്വികരായ ജനതയുടെ സംസ്ക്കാരമാണ് പരമ്പരാഗതമായി നാം കൊണ്ടാടുന്ന ആഘോഷങ്ങളെല്ലാം. ഭൂമിയിലെ ഓരോ ആഘോഷവും ആചാരാനുഷ്ഠാനങ്ങളാൽ സമൃദ്ധമാണ്. ശാസ്ത്രീയ അടിത്തറയുണ്ടെങ്കിലും ഇല്ലെങ്കിലും ഏതെങ്കിലുമൊരു കാര്യം ഒരേ ശൈലിയിൽ പലകുറി നടത്തപ്പെട്ടാൽ പിന്നീടവ ആചാരമായും അനുഷ്ഠാനമായും മാറുന്നതായി കാണാം. അതിനുള്ള ഉത്തമ ഉദാഹരണമാണ് വള്ളുവനാട്ടിലെ ചിനക്കത്തൂർ പൂരം. ഉച്ഛനീചത്വങ്ങൾ കൊടുംപിരി കൊണ്ടിരുന്ന കാലഘട്ടത്തിലും, സവർണ്ണരോടൊപ്പം അവർണ്ണരെന്നു മുദ്ര ചാർത്തപ്പെട്ടവർക്കും തൻ്റേതായ രീതിയിൽ പൂരം ആഘോഷിക്കാനുള്ള സ്വാതന്ത്ര്യം ഉണ്ടായിരുന്നു. ആഘോഷ പരമായി വേർതിരിവുകളും വ്യത്യാസങ്ങളും ഉണ്ടായിരുന്നെങ്കിലും അവയെ അവർ ആചാരമായും അനുഷ്ഠാനമായും കണ്ടുവന്നു. അതിൽ നിന്നുടലെടുത്തതാണ്  "ചിനക്കത്തൂർ പൂരം തനിക്കൊത്ത പോലെ" എന്ന ചൊല്ല് എന്ന് നിസംശയം പറയാം. ആ സ്വാതന്ത്ര്യമാണ് ഇന്നും ചിനക്കത്തൂർ പൂരത്തിന് ഒരോ വ്യക്തിയിലും മറ്റെങ്ങുമില്ലാത്ത ആവേശം നിറയ്ക്കുന്നതും. അവർണരുടെ ആഘോഷത്തിൽ സവർണർ പങ്കുചേർന്നതായതിനാലാണത്രെ ഈ സ്വതന്ത്ര്യം എല്ലാവർക്കും സിദ്ധിച്ചത്.  ചിനക്കത്തൂരിലെ ആചാരാനുഷ്ഠാനങ്ങളെക്കുറിചെറിയൊരു അന്വേഷണമാണ് "ചിനക്കത്തൂർ പൂരം - വള്ളുവനാടൻ സംസ്കൃതിയുടെ മുഖമുദ്ര." ഒരായിരം പരിമിതികൾക്കുള്ളിൽ നിന്നു കൊണ്ട് തയ്യാറാക്കിയ ഒരു കൊച്ചു ഡോക്യുമെൻ്ററി. തന്മൂലം ധാരാളം കുറവുകൾ ഇതിൽ കാണാം. എങ്കിലും ഒരു സംസ്ക്കാരത്തിന് തൻ്റേതായ രീതിയിൽ പ്രോത്സാഹനം നൽകാൻ കഴിഞ്ഞെന്ന സന്തോഷത്തോടെ ഇത് പ്രിയപ്പെട്ട സഹോദരങ്ങൾക്ക് മുൻപിൽ സമർപ്പിക്കുന്നു.  നന്ദി.!