Կավի հետ թրծվում է Հարթաշեն գյուղի ապագան

14–ամյա Մարտին Մնացականյանը կավից թռչնի բույն է պատրաստում, փոխանցում ընկերներին, ովքեր շարունակում են նրա սկսած գործը։ Մարտինը և Հարթաշեն գյուղի ավելի քան 25 երեխա այցելում են իրենց գյուղում բացված բրուտագործության արվեստանոց–դպրոցը։ Մեր այցելության օրը նրանք պատրաստվում էին Զատկի տոնին․ օրվա սիմվոլներով իրեր էին պատրաստում կավից։ «Մի քանի ամիս է, ինչ այցելում եմ խմբակ, արդեն կարողանում եմ տարբեր իրեր պատրաստել։ Ինձ դուր է գալիս կավի հետ աշխատանքը․ կարծում եմ հետագայում հոբբիից այն կփոխվի աշխատանքի, իհարկե սպորտին զուգահեռ»,– գործի ընթացքում պատմում է պատանին։ Կավագործության խմբակը բացվել է «Հոգ ընտանիքին» հիմնադրամի նախաձեռնությամբ, որի վերջնանպատակը ոչ թե հենց խմբակի բացվելն էր, այլև սաhմանամերձ Հարթաշեն գյուղի մշակույթի տան «վերակենդանացումը»․ այնպես, որ այնտեղ գործեն գրադարան, ներկայացումների և կինոցուցաադրումների համար դահլիճներ, արտադասարանական տարբեր խմբեր։ Նախատեսվում է, որ բրուտագործության բացված խմբակն էլ կտեղափոխվի մշակույթի շենք․ հիմա այն ժամանակավոր գտնվում է համակարգողի տան բակում առանձնացված սենյակում։ Ակնկալում են, որ հետագայում այն կկարողանա ինքնաֆինանսավորվել, նաև շահույթ ստանալ, աշխատատեղեր ապահովել գյուղի համար։ Ադրբեջանի հետ սահմանից ուղիղ գծով մի քանի հարյուր մետր հեռավորությամբ գտնվող գյուղում բրուտագործության արհեստանոց բացելու գաղափարի հեղինակը Հայաստանում Իտալիայի Հանրապետության պատվոր հյուպատոս, «Հոգ ընտանիքին» հիմնադրամի հիմնադիր Անտոնիո Մոնտալտոյինն է, ում նախաձեռնությամբ Գյումրում և Սպիտակում գործում են կերամիկայի դպրոցներ։