Qızm Güldanədən 4 ildir xəbər yoxdur –  ANA FƏRYAD EDİR

Ailəsi qızın sağ olduğuna inanır. “Qızım sonuncu dəfə 3 il 9 ay bundan qabaq məktəbə gedib və geri qayıtmayıb. Əvvəllər onun Samur-Abşeron su kanalına düşdüyü güman edilirdi. Aylarla o kanalda cəsədini axtarmışıq. Sonra dedilər, qara bir minik avtomabilinə oturub qaçıb. O vaxtdan indiyədək, demək olar ki, fasiləsiz olaraq qızımı axtarıram. Bir ata üçün bunun nə olduğunu anlamaq çətin deyil yəqin”. KONKRET.az xəbər verir ki, bu sözləri itikn hesab olunan Güldanə Tağıyevanın atası deyib. Xatırladaq ki, 2001-ci il təvəllüdlü Güldanə Tağıyeva 2016-cı ildən bəri itkin düşüb. O son dəfə oxuduğu Barlı kənd tam orta məktəbinə gedib. Dərsdən icazə alıb məktəbdən çıxan Güldanə Tağıyevadan daha sonra heç bir xəbər çıxmayıb. Quba rayonunun Barlı kəndində yaşayan Tağıyevlər ailəsi indiyədək qızlarının axtarışı ilə məşğuldur. Əvvəllər qızın Samur-Abşeron su kanalına düşdüyü güman edilib. Aylarla bu su kanalında qızlarının cəsədini axtaran ailə daha sonra ortaya çıxan digər ehtimallardan sonra axtarışları dayandırıblar. Qeyd edək ki, Güldanə Tağiyeva nişanlı olub. Ailə üzvləri ehtimal edir ki, o bəlkə də sevdiyi başqa bir şəxsə qoşulub qaçıb. “Eşitdiyim bütün ehtimallar əsasında onu axtarmışam”. Qızın axtarışları ilə məşğul olan polis əməkdaşı (Quba RPŞ) itkin düşən qızın atası Vaqif Tağıyevə ümidverici xəbər deyib: “Qızın ölməyib Vaqif kişi. O sağdır. Və bir gün mütləq üzə çıxacaq”. “Polis bir gün evə gəldi. O zamana qədər həmin polislə çox görüşmüşdük. Bu dəfə isə tam fərqli aurada idi. Üzündə təbəssüm, gözlərində sevinc var idi. Əlini çiynimə qoyub dedi ki, “Arxayın ol kişi. Daha qızın cəsədini axtarma. O, ölməyib, sağdır. Bir gün mütləq üzə çıxacaq”. Nə qədər yalvardım. Dedim nəsə bilirsənsə, de mənə. Amma heç nə demədi. Yenidən gülümsəyərək mənə dedi ki, qızım sağdır. Buna tam əmin ol”. Ailənin yaxın qohumları da belə iddia edir ki, qız azyaşlı olduğuna görə bəlkə də onu qaçıran şəxs cinayətdən yayınmaq üçün onun üzə çıxmasını gizlədir. 18 yaşı olandan sonra o, qayıdıb gələcək. Hələlik ailənin tək ümidi qızlarının 18 yaşının tamam olmasını gözləməkdir. Digər ehtimallardan biri də odur ki, qız atasından qorxduğu üçün üzə çıxmır. Güldanə Tağiyevanın valideynləri onu bağışladığını deyir: “Daha dözə bilmirik. Hardadısa qayıtsın”. 3 gün toy çaldıracam qapımda. Yetər ki gəlsin”. Cəlal FƏRZƏLİYEV (QUBA)