തിരുവനന്തപുരം കന്യാകുമാരി ട്രെയിൻ യാത്ര

ചരിത്രപരമായ കഥകളും പറയാനുണ്ട് കന്യാകുമാരിക്ക്. ഒന്നിച്ചു ജീവിക്കാൻ തീരുമാനിച്ച കന്യാ ദേവിയുടെയും ശുചീന്ദ്ര ദേവന്റെയും നഷ്ടപ്രണയത്തിന്റെ വേദന പേറുന്ന കഥയാണ് ഒന്ന്. കന്യാകുമാരി ദേവി ക്ഷേത്രം സന്ദർശിക്കാനെത്തുന്നവർ നിരവധിയാണ്. ഇന്ത്യയുടെ തെക്കേയറ്റത്തു സ്ഥിതി ചെയ്യുന്ന ക്ഷേത്രം എന്ന വിശേഷണവും ഈ ക്ഷേത്രത്തിനുണ്ട്. മത്സ്യബന്ധനത്തിന് പോകുന്നവരെയും കടലിലൂടെ സഞ്ചരിക്കുന്നവരെയും ദേവി സംരക്ഷിക്കുന്നു എന്നാണ് വിശ്വാസം. മൂവായിരത്തോളം വർഷം പഴക്കമുണ്ട് ഈ ക്ഷേത്രത്തിന്. ത്രിവേണി സംഗമത്തിന് തൊട്ടടുത്താണ് സ്ഥിതി ചെയ്യുന്നത്. നാനാ ജാതിമതവിഭാഗങ്ങളിൽപ്പെട്ടവർക്കും ഈ ക്ഷേത്രത്തിൽ കയറാം. പുലർച്ചെ 4.30ന് നടതുറക്കുന്ന ക്ഷേത്രം ഉച്ചയോടെ അടയ്ക്കും. പിന്നീട് വൈകുന്നരം നാലിന് നടതുറക്കുന്ന ക്ഷേത്രത്തിന്റെ നട അടയ്ക്കുന്നത് രാത്രി എട്ടു മണിക്കാണ്. നിരവധി സ്ഥലങ്ങൾ വേറെയുമുണ്ട് കന്യാകുമാരിയിലും സമീപപ്രദേശങ്ങളിലും സന്ദർശിക്കാൻ. അധികം കേട്ടുപരിചയമില്ലാത്ത ബീച്ചുകളുമുണ്ട്. മുട്ടം ബീച്ച്, ശംഖുതുറൈ ബീച്ച്, തേങ്ങാപ്പട്ടണം ബീച്ച്, ചൊത്തവിളൈ ബീച്ച് തുടങ്ങിയ സ്ഥലങ്ങളും സന്ദർശിക്കാം. കന്യാകുമാരിയുടെ പതിവ് ചിത്രങ്ങളിൽ നിന്ന് മാറി പച്ചപ്പും മണലുമൊക്കെ നിറഞ്ഞ സ്ഥലങ്ങൾ കാണണമെങ്കിൽ ഇവിടേക്കൊക്കെ പോകാം. സൂര്യാസ്തമയം കണ്ട് മടക്കയാത്രയുമാകാം.