عملت تجميعة PC اقوي من اللـ PS5 Pro! | إزاي وفرت 10,000 جنيه؟

بسم الله الرحمن الرحيم "ليه ممكن حد يدفع أكتر من 70 ألف جنيه في تجميعة PC، في حين إن PS5 Pro ممكن يخلص الموضوع بسعر أقل؟ السؤال ده كان منطقي جدًا بالنسبة لي، خصوصًا إني أصلًا مكنتش ناوي أطور جهازي دلوقتي. لكن خلال آخر 6 شهور، ومع شوية مشاكل ظهرت فجأة وارتفاع الأسعار بشكل غريب، قررت أبدأ تطوير الـ PC خطوة بخطوة. والنتيجة؟ تجميعة أقوى من PS5 Pro بفرق واضح، ومش بس في الألعاب… كمان في المونتاج والاستخدام اليومي. وفي الفيديو ده هحكيلكم إزاي طورت الجهاز، وإيه المشكلة اللي حصلتلي مع الرامات ووفرت عليا حوالي 10 آلاف جنيه." 00:00 المقدمة 00:31 التجميعة القديمة 02:00 اختيار القطع المناسبة 05:44 تجربة الألعاب 11:40 أسعار القطع 12:49 PS5 Pro ولا PC 13:49 النهاية 14:20 DLC النهاية أول حاجة بدأت بيها كانت الـ SSD.في الوقت ده أسعار الرامات بدأت تعلى، وبدأت تظهر إشاعات إن أسعار الهاردات والـ SSD كمان هتغلى، وده خلاني أتحرك بسرعة. الـ SSD اللي كان عندي كان 500 جيجا بس، وده في 2026 بقى قليل جدًا. الويندوز لوحده واخد مساحة، ومع لعبة أو لعبتين كبار، أو شوية ملفات مونتاج، مش هتلاقي مساحة. فبدأت أدور على SSD NVMe يكون سريع، ومساحته كبيرة، ويعيش معايا فترة طويلة من غير ما أحتاج أزود هارد تاني قريب. وفي الآخر الاختياري وقع على WD Black 2TB. بعدها بشهر تقريبًا، كنت خلاص قررت إن التجميعة القديمة لازم تتطور بالكامل. التجميعة القديمة كانت: Ryzen 5 5500 ASRock B450 Steel Legend RTX 4060 و 16GB RAM DDR4 بسرعة 3600 وعند النقطة دي، المشاكل بدأت تبان بوضوح. أول مشكلة إن المازر بورد كانت PCIe 3.0، في حين إن كارت الشاشة PCIe 4.0، وده كان عامل عنق زجاجة بسيط. هو مكنش كارثي، لكنه كان موجود، وخصوصًا في بعض الألعاب أو السيناريوهات اللي بتتأثر بسرعة الـ PCIe. تاني مشكلة كانت المعالج. Ryzen 5 5500 مع إنه معالج محترم، لكنه بدأ يبان ضعيف في الألعاب اللي بتحتاج معالج قوي، وكمان في المونتاج والاستريم مكنش أفضل اختيار بالنسبة لاستخدامي. أما كارت الشاشة RTX 4060، فهو كارت كويس جدًا في فئته، وخصوصًا بسبب إنكودر Nvidia الممتاز لصناعة المحتوى، لكن المشكلة كانت في 8GB VRAM وال بقت واضحة جدًا. سواء في الألعاب الجديدة أو في الاستريم أو حتى في بعض شغل المونتاج، الـ 8 جيجا بقوا قليلين، وده هنشوفه قدام لما نجرب أداء الكارت الجديد في الألعاب. أول تحدي حقيقي في التطوير كان الرامات. أسعار DDR5 كانت عالية جدًا، وده خلاني أقرر إني أفضل على DDR4 والقرار ده وفر عليا حوالي 10,000 جنيه. كنت في الأول بفكر أروح لمعالج Ryzen 5 7500F، لكن بما إني قررت أفضل على DDR4، كان لازم أغير الاتجاه وأروح لإنتل. كنت محتاج معالج قوي في الألعاب، كويس في الشغل والمونتاج، مناسب للاستريم، وفي نفس الوقت لو حبيت أقدر أطور لي mother board DDR5 بسهولة. وهنا استعنت بصديقي عبدالرحمن، لأنه كان برضه بيجمع جهاز وعنده خبرة أكتر مني في اختيارات المعالجات. تكييف. *** وبعد شوية تدوير، اخترت Arctic Freezer 36 Black. أولًا عشان البادجت، وثانيًا لأنه فعلًا كويس وخيار مناسب جدًا لي استخدامي. وبعد حوالي 6 شهور استخدام، أقدر أقول إن أداءه كان كويس جدًا بالنسبة لسعره. وملحوظة مهمة: تصوير الفيديو ده في أول شهر 6، والجو حر جدًا، وده اختبار كويس للكولر علشان نشوف أداءه في ظروف مش سهلة. بعد كده اختيار المازر بورد كان واضح. كنت محتاج لوحة سعرها كويس، وتؤدي الغرض مؤقتًا لحد ما أسعار DDR5 تهدى، وبعدها أقدر أطور لمنصة أقوى. فالاختيار وقع على ASUS Prime B760M DDR4. أما الرامات، فكانت أسهل قرار، لأني كملت على الرامات اللي عندي بدل ما أشتري جديد. نيجي بقى لأهم قطعة في التجميعة: كارت الشاشة. هنا القرار كان صعب شوية، لأني كنت محتاج كارت يكون أقوى من RTX 4060 بنسبة ملحوظة، على الأقل 30%، وفي نفس الوقت يكون فيه VRAM أكتر من 8GB. فكرت في RX 9060 XT 16GB من AMD، لكن بالنسبة لي الإنكودر مهم جدًا، سواء في الاستريم أو المونتاج، وهنا Nvidia لسه ليها أفضلية واضحة. وعشان كده قررت أروح لـ RTX 5060 Ti 16GB. من asus وال خلاني اختار asus ان كنت جربت ال rtx 4060 من asus برضو وال كانت درجة حرارته كويسة وكمان صوت المراوح هادي جدا وعمتا انا بحب asus, فا جايب اغلب القطع منها الكارت أقوى من RTX 4060 بحوالي 35% إلى 40% حسب اللعبة والإعدادات، ومعاه ضعف حجم الـ VRAM، وكمان فيه تقنيات الجيل الجديد زي DLSS 4 و MFG، بالإضافة لإنكودر Nvidia الجديد اللي ممتاز لصناعة المحتوى. كملت على الكيسة القديمة، ومعاها باور XPG 750W Bronze، لحد ما أقرر بعدين هطور المازر بورد لمنصة Micro ولا ATX عادية. وعارف إن أكتر حاجة مستنيينها هي تجارب الألعاب، بس عارف ايه اكتر حاجة انا مستنيها انك تعمل لايك وتشترك في القناة ويلا نشوف أداء التجميعة الجديدة عامل إزاي. جزء تجارب الألعاب والحرارة والأداء بعد ما شوفنا الأداء، خلونا نرجع للسؤال الأساسي: هل التجميعة دي فعلًا كانت تستاهل؟ من ناحية الأداء، الفرق بالنسبة لي كان واضح جدًا. مش بس في الألعاب، لكن كمان في الاستخدام اليومي، المونتاج، الاستريم، وراحة التعامل مع البرامج الثقيلة. نيجي بقى للأسعار وقت تصوير الفيديو. أقل سعر شوفته لـ RTX 5060 Ti 16GB كان حوالي 30,500 جنيه. معالج i5-14600K كان في حدود 15,000 جنيه. كولر Arctic Freezer 36 Black حوالي 2,000 جنيه. رامات 16GB، قطعتين 8GB DDR4 3200 CL16، حوالي 6,500 جنيه. المازر بورد Micro ASUS PRIME B760M DDR4 في حدود 5,000 جنيه. أسعار الـ SSD حاليًا مش أفضل حاجة، لكن وجود SSD سريع بقى مهم جدًا. مثلًا ال gen4 NVMe 1TB في حدود 7,200 جنيه. الكيسة حسب اختيارك وذوقك، لكن أهم حاجة الباور. بلاش تستخسر في الـ PSU، وأقل حاجة أنصح بيها هنا 750W Bronze من شركة محترمة.