Sihses me tuhkehn wain mehlelo

Kumwail poadohngie Sohster Hinga Sohn 15: 1-6 “Ngehi me tuhkehn wain mehlel, a Semeio soumwet men. Rah koaros me wosasang ie ahpw sohte wa, Semeio kin ketikihsang. E kin koahkoa rah koaros me kin kapwarehda wa, pwe re en pil wa tohtohla. Kumwail mwakelekelkidahr mahsen kan me I padahkihongkumwailehr. Kumwail poadohng ie, oh I pil pahn poadohng kumwail. Ma kumwail sohte poadohng ie, kumwail sohte kak wa, duwehte rahntuhke pwoat pil sohte kak wa, ma e sohte poadohng ni kahlap en tuhkeo. “Ngehi me tuhkehn waino, oh rah kan kumwail. Mehmen me poadohng ie, oh ngehi ong ih, pahn uhdahn wa tohto; pwe kumwail sohte kak wia mehkot ma I sohte pahn ieiang kumwail. Mehmen me sohte poadohng ie pahn lekdekla oh mengila, duwehte rahntuhke pwoat. Soangen rah pwukat pahn kohpene oh lekdeklahng nan kisiniei, wasa me re pahn isihsla ie. Ma Krais mahsanih me ihme tuhkehn wahin mehlel, ah udahn pahn pil mie tuhkehn wahin likamw. Tuhkehn wahin mehlelo iei ih semen me mehlel koaros. • Sohn 14:6 Sises mahsanih, “Ngehi me ahl, mehlel oh mour. Sohte me kak kohla rehn Sahmo ma sohte ngehi.” Tuhkehn wahin likamw ieih semen likamw koaros. • Sohn 8:44 Kumwail kadaudok en Tepil, pwehki iei ih samamwail, oh kumwail kin nantihong kapwaiada mehkan me samamwailo kin inengieng. Sangete nin tapio, ih sounkamaramas emen. E sohte kin miniminiong me mehlelo, pwehki me mehlelo sohte mi reh. Ni ahnsou me e kin koasoia likamw, e kin wiewiahte me e ahnlahr, pwehki ih likamw men, oh pil semen soangen likamw koaros. Ma kitail pahn tehk mwahu nan pwuhk Sarawi, soahng koaros me kepikipik da pwehn wia mehkot me mwahu, udahn mie peliepe. ⁃ mour ohng mehla ⁃ mehlel ohng likamw ⁃ ahl tehtik oh ahl tehlap ⁃ tuhke koaros nan mwetuwelo ira kak kang ah pil mie ehu me ira sohte kak kang Komwi oh ngehi, Kauno sohte lidere ata pilipil. Eri mehnia tuhkehn wahin me komwi pilada poadohng rahnwet? Wasahn wadawad kadehdehiong kita me kita me wia rahntuhkehu. Wahn tuhke kin sansalda sang ni rahkan. Rahn tuhkehu udahn pahn wia ah pwukoah en kapwarehda wah, wah mwahu. Eri kita kasalehda wahn tuhkehn wahin mehlelo. • Luk 6:44 Kitail kin esehki tuhke koaros wahrail kan. Sohte me kak dolungasang wahn wain ni tuhke tekatek kan, de dolungasang kehngid ni tuhke leles. Mehlel oh likamw sohte kak patpene. Tuhkehn wahin mehlel pahn wa mehlel. • Kalesia 5: 22 A iet akan wahn Ngehno: limpoak, peren, popohl, kanengamah, kadek, loalopwoat, opampap, oh liksang me suwed. Sohte kosonned ehu me kin uhwong mepwukat. Wahn tuhkehn wahin likamw iei soangen likamw, suwed koaros. • Kalesia 5:19-21 Eri wiewia kan nin duwen ahnepen aramas me sansal, iet akan: nenek oh kamwahl, tiahk samin, pwongih dikedik en eni kan, oh wunahni; kailok, akatat, luwak, lingeringer, oh akamai, saminimin, mehwo, peirin, sakaula, oh soahng teikan me duwehte mepwukat. I ndaiong kumwail met duwehte ei ndaiongkumwailehr mahs: irail kan me kin wia soahng pwukat sohte pahn iang sohsohki Wehin Koht. Kalesia 6:8-9 Ma e padokedi nan mwetuwel en paliwere ineng en paliwar, e pahn dolungasang mehla; a ma e padokedi nan mwetuwel en Ngehn, e pahn dolungasang rehn Ngehno mour soutuk. Eri, kitail dehr pwangahki atail wiewia mwahu kan; pwe ma kitail sohte pahn pwangahkihda, ahnsou pahn leledo kitail ahpw pahn dolung. Nan Senesis, Kauno mahsanihong sahpw en kapwarehda wah, sehd en kapwarehda audepe. E ahpw mahsanihong pehin ih, “Na kitail wiahda aramas rasohng kitail.” E ahpw wiahda aramas oh poukohng ahng en mour. Met wehwehki: -mwahmw akan pahn kakete mour nan sed tuhke kan pahn kakete mour nan pwehl -aramas pahn kakete mour rehn Koht 1 Sohn 5: 9-13 Kitail kin kamehlele kadehde kan sang rehn aramas, a kadehdeo me Koht kin ketikihong kitail me laudsang, oh iei kadehdeo me Koht ketin kadehdehki Sapwellime Iehros. Eri, mehmen me kamehlele Sapwellimen Koht Iehros kin ahneki kadehde wet nan eh mohngiong; a me sohte kin kamehlele Koht, e kin kalikamwe Koht, pwehki eh sohte kamehlele kadehdepen Sapwellime Iehros, me Koht ketin kadehdehki. A iet kadehdeo: Koht ketikihongkitailehr mour soutuk, a mour wet kitail alehsangehr Sapwellime Iehros. Mehmen me kin ahneki Sapwellime Iehros, e pil ahneki mour wet; a mehmen me sohte kin ahneki Sapwellimen Koht Iehros, e pil sohte ahneki mour. I ntingkiwohng kumwail met pwe kumwail en ese me kumwail kin ahneki mour soutuk, kumwail me pwoson mwaren Sapwellimen Koht Iehros. Komwi oh ngehi weksang kepikipik koaros. Kita anahne mour wet rehn Koht. Kita pahn anahne Sises pwe kita en kak ahneki mour soutik rehn Koht. Wiewia 4:12 “Sangete reh me komourpen aramas kak dierekdahsang, pwe ihte mwar wet me Koht ketikihong aramas akan, pwe en wia Sounkomourpatail nin sampah.”