İmam Şafi | Şeyx Qamət Süleyman

İmam Şafi Adı: Muhəmməd. Soyadı: İdris. Muhəmməd ibn İdris Miladi təqvimlə 767-ci ildə doğulmuş, 820-ci ildə vəfat etmişdir. Hicri təqvimlə 150-ci ildə dünyaya gəlmiş, 204-cü ildə isə vəfat etmişdir. İmam Şafi İmam Əbu Hənifə vəfat edən ildə dünyaya gəlmişdir. 54 il ömür sürmüşdür. Fələstində doğulmuşdur. Nəsli əhli beytdən idi. Lüğət alimləri icma ediblər ki, İmam Şafi ərəb dilində hüccətdir. O, Məkkədə, Mədinədə Yəməndə, Bağdadda və Misirdə olmuşdur. İmam Şafinin hafizəsi də güclü idi. Baxdığı səhifəni bir dəfəyə əzbərləyərdi. İmam Şafi İmam Malikin tələbəsi olmuşdu. İlk dəfə fiqh üsulu barəsində “Risalə” adlı kitabı yazmışdır. İmam Şafi dörd fiqh məzhəbi alimlərindən üçüncüsüdür. İmam Şafinin məzhəbi barədə onun tələbəsi, həmçinin böyük alimlərdən olan İmam Muzəni “Muxtəsər” adlı kitabı yazmışdır. İmam Şafi hüccətli alim idi. Bir gün əməlləri imandan görməyən bir kəs İmam Şafi ilə mübahisə edir. İmam Şafi həmin adamdan Quran və sünnədən dəlil gətirməsini istəyir. O kişi də deyir: "Uca Allah Qurani-Kərimdə belə buyurur: “İman gətirib və yaxşı əməllər edərlər.” Bu ayədəki “və” bağlayıcısı ayırıcı ədatdır. Yəni "iman əməldən ayrı olur və imana bağlı bir şey deyildir" demək istəyir. İmam Şafi ondan soruşur: “Sən bu ayədəki “və” ədatını “fasil” (ayırıcı ədat) görürsən?" O kişi cavabında: "bəli", - deyir. İmam Şafi deyir: "O zaman sən iki Rəbbə ibadət edirsən". Kişi: "Necə yəni?" İmam Şafi deyir: "İndi oxuyacağım bu ayənin mənasına görə sənin sözünlə iki rəbb olmalıdır. Uca Allah buyurur: “iki məşriqin və iki məğribin rəbbi”... (Ayə) Çünki bu ayədə "və" ədatı ayırıcı ədatdırsa, o zaman məşriqlərin rəbbi başqa, məğriblərin rəbbi başqa ilahdır. O kişi: "Əstəğfirullahə və ətubu ilehi (Allaha tövbə edirəm və bağışlanma diləyirəm)", - deyir. #ŞeyxQamətSüleyman #Alimlər