රට දැය බේරාගත් සුරූපී සෝමා දේවිය ගැන ඔබ නොඇසූ කතාව | Helabima TV

පරාජය නිසා වළගම්බා රජුට සිදුවූයේ සෝමා දේවිය, අනුලා දේවිය, ඇගේ පුත් මහාචූලික කුමරු හා සිය පුත් මහනාග කුමරු කැටුව පලා යන්නට ය. ගැබිනියක වූ අනුලා දේවි පසු වූයේ යහපත් සෞඛ්‍ය තත්ත්වයෙන් නොවේ. ඔවුන් රථයක නංවාගත් රජතෙමේ සතුරන් කෙරෙන් පලායාම ඇරැඹුවේ ය. බුදුන් දන් වැළැදූ පාත්‍රා ධාතුව ද අනුරාධපුර රජ මාළිගයෙහි වූ නමුත් පලා යාමේ කලබලය නිසා රජුට එය ගෙන යන්නට අමතක විය. රථාචර්යය, හැකි තාක් වේගයෙන් අසු මෙහෙයැවී ය. ඔවුන් පණ්ඩුකාභය රජු විසින් කැරැවන ලද තීර්ථකාරාමයත් පසු කැර යද්දී එහි වූ ගිරි නම් නිඝණ්ඨයා ‘මහා කළු සිංහලයා පලා යනවෝ !” යි මහ හඬින් ප්‍රීති ඝෝෂා කළේ් ය. ඒ කන වැකුණු රජු යළිත් තමා රජ පැමිණි විට ඒ තීර්ථකාරාමය විනාශ කොට එහි විහාරයක් ඉඳි කිරීමට අධිෂ්ඨානය කැරැගත්තේ ය. වේගයෙන් අසූ මෙහෙයවන්නට රියැදුරා කොතෙක් උත්සාහ කළ ද අවශ්‍ය තරම් වේගයෙන් රථය ඉදිරියට නොගියේ ය. එයට හේතු වූයේ රියෙහි බර අධික වීම බව සියල්ලන්ට ම අවබෝධ විය. වේගය වැඩි වන්නට නම් රියෙහි බර සැහැල්ලු විය යුතු ය. රථයේ සිටින පිරිසගේ අධික බර අසුගේ වේගයට බාධාවකි. රජ බිසෝවරුන් දෙදෙනා දරුවන් දෙදෙනා රජු සහ රියැදුරා ඇතුළු හය දෙනෙක් එහි වූහ. වංගු සහිත පාරේ සතුරන් තමන් ලුහුබැඳ එන බව ඔවුහු දනිති. එහෙත් සතුරන් ඇත්තේ තමන්ට කොතරම් ඇතින්ද යන්න දැකගත හැක්කේ වංගු රහිත, සෘජු මංතීරුවක දී පමණි. කෙසේ හෝ වේවා ගමන් වේගය වැඩි කැරැගත නොහැකි වුවහොත් තවත් වැඩි දුරක් යන්නට පළමු ව තමන් සතුරන් අතට පත් වන බව රජු ඇතුළු සියලු දෙනාට ම වැටැහී ඇත. රථයේ වේගය වැඩි කැරැගන්නට නම් ඒ තුළ ඇති පිරිස අඩු කැරැගැනීම හැර අන් විකල්පයක් නොවීය. ගැබිනියක ව දුර්වල සෞඛ්‍ය තත්ත්වයෙන් සිටින අනුලා බිසව හෝ දරු දෙදෙනා හෝ බැස්විය නොහැකි ය. ප්‍රධාන අවශ්‍යතාව වනුයේ සතුරන් අතට පත් වන්නට අවකාශ නොතබා රජු බේරා ගැනීම ය. මේ ව්‍යසනයෙන් රජතුමා බේරාගත හැක්කේ තමාට පමණක් බව වටහාගත් සෝමා දේවිය නොපැකිළිව ඒ සඳහා ඉදිරිපත් වූයේ වළගම්බා රජු වෙනුවෙන් සිය ජීවිතය කැප කිරීමේ එඩිතර අධිෂ්ඨානය ඇතිව ය. එය රට ජාතිය බේරා ගැනීම සඳහා කැරෙන කැපවීමකි. තවමත් තරුණ වියෙහි පසුවන සුරූපියක වූ සෝමා දේවිය වැනි අභාග්‍ය සම්පන්න ඉරණමකට ගොදුරු කැර අතරමඟ දමා යන්නට සිත එකඟ කැරගැනීම වළගම්බා රජුට අතිශයින් දුෂ්කර කරුණක් වුව ද සතුරන්ගෙන් රට බේරාගත හැක්කේ තමා ආරක්ෂා වුවහොත් පමණක් බව ඒ සමඟ ම රජුට ප්‍රත්‍යක්ෂ විය. තම ඉණෙහි සඟවාගෙන තිබූ චූඩා මාණික්‍යය සෝමා දේවිය අත තබා ඉන් ඇගේ ආරක්ෂාව සැලසේවා යි ප්‍රාර්ථනය කළ වළගම්බා රජතෙමේ ඇගේ ඉල්ලීමට එකඟ වූයේය. හෙමිහිට රථය නතර කැරැවා ඉන් බැසගන්නට යාමෙන් ද සිදු වනුයේ තමන් වෙත ළංවීම පිණිස සතුරාට තවත් ඉඩ සැලැසීම බව කී සෝමා දේවිය සුදුසු තැනක් බළා, දිවෙන රථයෙන් බිමට පැන වහා කැලය තුළට වැදුණා ය. බර සැහැල්ලු වූ රථය සතුරන්ගෙන් බේරී වේගයෙන් පලා ගියේ ය. ඉන් පසු සිදු වූ දේ පිළිබඳව මහාවංසය මෙසේ සඳහන් කරයි. (මෙම වැඩසටහන අවසරයකින් තොරව Facebook Page හෝ වෙනත් YouTube Channel වෙත, සම්පූර්ණයෙන් හෝ කොටස් වශයෙන් upload කිරීම තහනම්. Uploading this program in whole or in part to Facebook Pages or other YouTube Channels is strictly prohibited.) © Helabima TV