أمونة بت الشيخ حمد.. عيسى بروي

نعالج القبح بالجمال ـــــــــــــــــــــــــــــــــــــــ أمونة بت الشيخ حمد ـــــــــــــــــــــــــــــــــــــــ كلمات: نجم الدين الكرفابي ـــــــــــــــــــــــــــــــــــــــ أمونة بت الشيخ حمد أبوها كان مزواج خلاص ناسب جميع ناس البلد ميلادها كان عرسا كبير هيصة وضبائح ما ليها حد يوم السماية إتيتمت وحُكم القدر في الأم نفد جرت السنين وإتفاوتن عن ناسنا ما ليهن عدد أمونة كبرت وإستوت فار الصدير شال النهد وبقت أمل كل الشباب وجمالها في بت ما إتوجد في مرة رفا قليبها يوم حبت قريب الشيخ حمد وأظن كمان حباها هو سوا الضلوع لي حبو سد كاتمين غرامن في الضلوع ولع لهيبو ما برد خايفين يصارحو يقولو شىء والخبر يملا البلد والحب هناك عيباً كبير لا بت تبوحبو ولا ولد سنتين تلاتة مضت خلاص والبت حياتهابقت نكد برضو الولد زي حالتا وقليبو داك مكتول كمد في يوم أبوها ضحك كتير برم شواربو بلا الأسد ناداها آمني تعالى جاي فوق البرش ربع قعد قالتلو هوى جاياك خلاص وقليبها فَّرّ وما رقد هابت عيونو قبل يقول شافت وشيهو عليهو جد حاج الخضر عارفاهو داك..!! قالتلو أيوة أبو سند جاني الصباح طالب يداك داير نسب شيخ البلد وأنا قُتلو مرحب بيك تعال يومين تلاتة تكون عقد راجلاً عظيم عنده القروش عنده الحرير راقد لِبد وكمان كريم وأخو رجال ماعونو فد يوم ما برد جرت الدموع من عينا شو وسكتت وأبت تديهو رد وكتين غِلب وإحتار خلاص ولع فؤاده جمر وَقد فسر سكوت البت رُضا جاب زولو لمّا الناس عقد والمال مخمخم والحرير تحت الرجول مدوه مد دق الدليب صحت العيون ما خلا فد مخلوق غمد يوم الصُفاح والناس تجوط بالفرحة مقلوبة البلد أمونة تبكي بكى السواد بدل الفرح جاها النكد وبشيشها قامت للمروق منسرقة ما حَّسابَــا حد كان الحبيب راقد هناك والصدمة قدت قلبو قد حاضن ربايتو وحيد ينوح كم جَّرا للمٌسدار جبد وقفت قصادو بكت كتير لامن دِميع العين جمد قالتلو ما بي إيدى شىء ديل ناس أبوى وأبو سند أتلملموا سوهوا الكلام وأنا لا رضيت لا جبت رد داك عندو مالاً مو قليل وأبوى شاف المال سجد وأداني للراجل العجوز المن عروقو الدم شرد قايلنى بسعد بالقروش والله المراح الفات ورد لكن محال أسعد بلاك كان السماء الينهدَّ هَد بديك قليبي وروحي ديل وبعيش هناك صورة وجسد إتراجعت دارت تعود لكن قليبها رجع رفض مسكت دريباً مو غريب كم بيهو صف بنوت ورد قاصدة البحر دارت تموت لا عيشة لا هم لا نكد إترددت وقفت كتير لامن قليبها خلاص صمد شافت مسار النيل حزين حتى النخيل حزنان خمد وبشيشها فكفكت الحرير لا زينة لا ربيط عُقد ما دام حياتها بقت دموع وقليبها من زولا إنفرد قالت أخير أرتاح خلاص أرسى وشقاي ألقالو حد وفي لحظة موج النيل علا وفي جوفو غابت للأبد ………… إنا لله ياخ