Ish-reparti ushtarak në Bushat bëhet Qendër Rajonale e EC

Ish-reparti ushtarak në Bushat do të kthehet në Qendër Rajonale të Emergjencave Civile. Ministri i Mbrojtjes Pirro Vengu, i shoqëruar edhe nga drejtori i Agjencisë Kombëtare të Mbrojtjes Civile, Haki Çako, prefektja e qarkut Shkodër, Majlinda Angoni dhe komandanti i Komandës Mbështetëse gjeneral brigade Aleksandër Pando inspektoi punimet për transformimin e tij. Teksa u njoh me projektin, ministri Vengu tha se, ai është pjesë e një nisme më të gjerë për të rivlerësuar asetet e amortizuara të Forcave të Armatosura, duke i kthyer ato në funksion të ri për qëllime civile dhe ushtarake. Sipas ministrit të Mbrojtjes, në bashkëpunim me Komandën Mbështetëse, Prefekturën e Shkodrës dhe Agjencinë Kombëtare të Mbrojtjes Civile është përcaktuar që ky repart i lënë në harresë prej vitesh të transformohet në një strukturë moderne, e gatshme për t’u përballur me emergjencat natyrore dhe situatat e jashtëzakonshme. “Qendra Rajonale e Emergjencave Civile në Bushat synon të mbështesë kapacitetet e bashkive të Shkodrës dhe Lezhës, veçanërisht në zonën midis Shëngjinit dhe Velipojës, të cilat përballen me rreziqe të shtuara për shkak të fluksit të turizmit gjatë gjithë vitit. Ajo do të shërbejë si një nyje bashkërendimi në reagimin ndaj zjarreve, përmbytjeve apo fatkeqësive të tjera natyrore”, - u shpreh ministri Vengu, gjatë inspektimit. Ai sqaroi se puna për rehabilitimin e objektit tashmë ka nisur, falë përkushtimit të Komandës Mbështetëse, e cila ka mundësuar rihapjen e aksesit në mjediset e repartit, duke ndihmuar zbatimin e plotë të projektit. Krijimi i kësaj qendre rajonale përforcon angazhimin e Ministrisë së Mbrojtjes dhe strukturave të Mbrojtjes Civile për një reagim më të shpejtë dhe të koordinuar ndaj emergjencave si dhe për ndërtimin e një infrastrukture moderne në shërbim të sigurisë së komunitetit.