کټوازی: لوګر کې لوی معیاري مسجید، مجهزه کتابخانه او له مسجید سره پراخه شنه ساحه مې تاسو ته تحفه

محمد میرزا کټوازی: لوی معیاري مسجید، مجهزه کتابخانه او له مسجید سره پراخه شنه ساحه مې تاسو ته تحفه د پکتیا په تیرا کې د یو کلینیک او په لوګر پوهنتون کې د کتابخانې او جومات د بنسټ ډبره کیښودل شوه جمعه- ۱۶ سنبله ۱۴۰۳ نن د جمعې په مبارکه ورځ د ملي تجار ښاغلي محمد میرزا کټوازي په شخصي لګښت لومړی د لوګر ولایت په پوهنتون کې د یوې لویې کتابخانې او یو عصري جومات او ورپسې د پکتیا ولایت په تیرا سیمه کې د یو نوي کلنیک د بنسټ ډبره کیښودل شوه او تر څنګ یې د مسافرو لپاره د یو عصري ریستورانت پرانسته هم وشوه. په همدې موخه د لوګر ولایت په دولتي پوهنتون کې په جوړه شوې غونډه کې د کورنیو چارو وزارت د تامیناتو معین مو-لوی عبدالله مختار، د لوګر ولایت والي شیخ- ضیاالرحمن مدني، د لوګر پوهنتون رئیس -مفتی ضیاالاحمد، د سرای شهزاده د صرافانو رئیس حاجي بهرام خان ځدراڼ، ټولنیز فعال جنرال مبین خان قومي مشر حاجي سالم احمدزی او نورو محترمو مشرانو، استادانو او محصلینو برخه اخیستې وه. د غونډې ګډونوالو د کټوازي کمپنیو ګروپ له عمومي رئیس محمد میرزا کټوازي څخه مننه وکړه چې د لوګر د مشرانو او ځوانانو غوښتنه یې په ورین تندي ومنله او د پوهنتون لپاره یې د جومات، علمي تحقیقاتي مرکز او شنې ساحې د جوړیدو وعده پوره کړه او نن یې د دې ولایت خلکو ته غوره ډالۍ ورکړه. عمومي رئیس محمد میرزا کټوازي وویل خوشحاله یم چې نن د کټوازي کمپنیو ګروپ له بودیجې په لوګر او پکتیا ولایتونو کې د دریو مهمو پروژو د بنسټ ډبره ږدم. نوموړي وویل د علمي تحقیقاتي مرکز، کلینیک، جومات او شنې ساحې پروژې د سیمي د خلکو لومړنۍ او ضروري غوښتنې وې چې د ګروپ تخنیکي ټیم پرې په ډیر دقت کار کړی او چارې به یې نږدې یو کال کې بشپړې شي. نوموړي زیاته کړه چې پرمختللي او په ځان بسیا هیوادونه هیڅکله د پردیو مرستو په پیسو نه دي جوړ شوي بلکې د همغه هیوادونو د ټولو قشرونو په ګډ کار او همکارۍ اباد شوي دي. ښاغلي کټوازي زیاته کړه چې د خپلو خیریه چارو د پراختیا تر څنګ به خلکو ته په بیلابیلو برخو کې کاري فرصتونه هم رامنځته کړي.