IL-PULIZIJA SSOLVI L-OMIĊIDJI KOLLHA LI SEĦĦEW FL-2019

ONE.COM.MT •Il-Pulizija solviet l-omiċidji kollha li seħħew matul l-2019 b’din is-sena tiġi mniżżla wkoll bħala l-anqas sena li fiha seħħew omiċidji tul dawn l-aħħar dsatax-il sena. Fl-elfejn u dsatax b’kollox inqatlu erba’ persuni fi tliet omiċidji separati u l-Pulizija b’kollox ressqet ħames persuni mixlija b’dawn ir-reati. Din is-sena wkoll il-Pulizija sovliet ukoll każ taż għajbien ta’ tfalja li seħħ ħdax-il sena ilu. Każ li beda jitqies bħala omiċidju wara li raġel ammetta mal-Pulizija li qatilha u ħa lill-investigaturi fil-post fejn kien ħeba l-katavru tagħha fil-Belt. Aktar dettalji fis-servizz ta’ Kyle Mifsud. KITBA: KYLE MIFSUD FILMATI: ONE CREW Il-Pulizija u l-iskwadra tal-omiċidji mmexxija mill-Ispetturi Keith Arnaud, Kurt Zahra u James Grech solviet l-omiċidji kollha li seħħew matul din is-sena. L-elfejn u dsatax kienet l-anqas sena li fiha kellna omiċidji f’dawn l-aħħar dsatax-il sena. Din is-sena f’pajjiżna kellna tliet omiċidji li ħallew warajhom erba’ vittmi. L-ewwel omiċidju tas-sena seħħ fis-sitta u għoxrin ta’ Marzu meta r-raħal ta’ Ħal Għaxaq inħasad bl-aħbar tal-mewt makabru ta’ Maria Lourdes Bonnici u bintha Angele Bonnici. Wara jumejn irrapportati nieqsa, il-Pulizija sabet il-katavri tal-omm u l-bint f’għalqa fi Triq Santu Kristu f’Ħal-Għaxaq stess. Dwar dan il-każ il-Pulizija arrestat u xliet lil Joseph Bonnici, iben u ħu l-vittmi. Fil-Qorti nstema’ kif in-nisa nqatlu permezz ta’ daqqiet f’rashom u wara ġew sparati tiri minn arma tan-nar. It-tieni qtil tas-sena seħħ fis-sitta t’April f’Ħal Far. Dakinhar żewġ persuni sparaw tiri fuq tliet immigranti li kienu mexjin biswit iċ-ċentru miftuħ minn karozza, b’ Lassana Cisse Soleyman jinqatel kiesaħ u biered b’tir f’rasu waqt li ż-żewġ immigranti l-oħra ndarbu serjament. Il-ħidma tal-invesitgaturi wasslet biex il-każ jiġi solvut madwar xahar wara meta arrestat żewġ suldati żagħżagħ, Lorin Scicluna u Francesco Fenech/ Huma ġew mixlija li qatlu lil Lassana f’dak li hu meqjus bħala l-ewwel qtil b’motivazzjoni razzjali. L-aħħar omiċidju tas-sena seħħ fid-29 ta’ Novembru meta l-Pulizija sabet raġel mixħut f’għadira demm quddiem il-monument tar-Repubblika fil-Marsa. Wara jiem ta’ investigazzjoni l-Pulizija ressqet żewġ Somali l-Qorti u akkużathom bil-qtil tal-ġuvni ta’ 25 sena mill-Eritrea. Din is-sena wkoll il-Pulizija bdiet tqis ukol l-għajbien ta’ Charlene Farrugia bħala omiċidju. Hija kienet ġiet irrappuratata nieqsa f’Novembru ta’ ħdax-il sena ilu meta dak iż-żmien kellha ħamsa u għoxrin sena. Dan il-każ ħa żvolta ġdida fid-dsatax ta’ Lulju meta l-Pulizija kienet qed iżżomm lil John Paul Woods li dakinhar kien akkużat li wettaq serqa u żamm erba’ persuni kontra r-rieda tagħhom f’ħanut tal-merċa fil-Gżira. Waqt li kien qed jiġi interrogat mill-Pulizija huwa qal li kellu informazzjoni dwar l-għajbien ta’ Farrugia u sostna li allegatament kien hu li qatilha u ħeba biċċiet mill-katavru tagħha f’daħla fis-sur tal-Belt. Huwa ħa lil Pulizija fil-post fejn kien ħeba l-katavru fejn testijiet tad-DNA kkonfermaw li l-għadam li nstab kien verament tat-tfajla Maltija minn San Pawl il-Baħar.