KAMATI YA ALAT MKOA WA KATAVI YARIDHISHWA NA UHAMISHAJI WA WANANCHI LUHAFWE

Kamati ya Chama cha Serikali za Mitaa Tanzania (ALAT) Mkoa wa Katavi imeridhishwa na utekelezaji wa zoezi la uhamishaji wa wananchi 648 kutoka eneo la uwekezaji la Western Luhafwe kwenda Mji Mpya wa Igalukilo, Wilayani Tanganyika, kufuatia maamuzi ya Serikali ya kupisha shughuli za uwekezaji. Ikiongozwa na Mwenyekiti wake, Mhe. Hamad Hassan Mapengo, Kamati imekagua maendeleo ya maandalizi ya makazi na miundombinu ikiwemo barabara, upimaji wa viwanja, pamoja na huduma za afya na elimu, na kuipongeza Halmashauri ya Wilaya ya Tanganyika kwa hatua kubwa iliyofikiwa. Mhe. Mapengo amesema Kamati imeridhishwa na kasi ya utekelezaji wa maagizo ya Serikali na kuwataka wananchi ambao bado hawajahama kutekeleza zoezi hilo kwa wakati ili kupisha uwekezaji unaotarajiwa kufanyika katika eneo hilo. Kwa upande wake, Halmashauri imeeleza kuwa kila kaya itapatiwa kiwanja cha makazi, ekari sita za ardhi kwa shughuli za kilimo pamoja na hati miliki, huku wananchi waliohamia wakieleza kuridhishwa na maandalizi yaliyofanywa na Serikali. Katika ziara hiyo, Kamati pia ilikagua ujenzi wa Shule ya Awali ya Mchepuo wa Kiingereza (English Medium) na kusisitiza ukamilishwe kwa wakati ili kuanza kutoa huduma bora za elimu kwa wananchi wa Wilaya ya Tanganyika.