DKT. KHALID: ONGEZEKO LA WATU LAZIMA LIENDANE NA MIPANGO BORA YA MATUMIZI YA ARDHI

Waziri wa Ujenzi na Uchukuzi Zanzibar, Dkt. Khalid Salum Mohamed, amesema ukuaji wa kasi wa idadi ya watu nchini unahitaji kuwepo kwa mipango madhubuti ya matumizi ya ardhi ili kuhakikisha rasilimali hiyo muhimu inaendelea kutumika kwa ufanisi kwa manufaa ya kizazi cha sasa na kijacho. Akifungua Jukwaa la Majadiliano la Sekta ya Ardhi na Makazi lililoandaliwa na Wizara ya Ardhi na Maendeleo ya Makazi katika Hoteli ya Golden Tulip Airport, Mkoa wa Mjini Magharibi, Dkt. Khalid amesema Zanzibar imeendelea kushuhudia ongezeko kubwa la idadi ya watu kutoka takribani laki tatu hadi zaidi ya milioni 1.8 kwa sasa. Ameeleza kuwa makadirio yanaonesha idadi hiyo inaweza kufikia watu milioni sita ifikapo mwaka 2050 au 2060, hali inayohitaji mipango bora ya matumizi ya ardhi ili kuepusha changamoto za makazi, miundombinu na maendeleo ya kijamii. Aidha, amesema sekta ya ardhi ni sekta mtambuka inayochangia maendeleo ya kilimo, uvuvi, elimu, miundombinu na uwekezaji, hivyo usimamizi wake unapaswa kupewa kipaumbele maalum. Kwa upande wake, Naibu Waziri wa Ardhi na Maendeleo ya Makazi, Swalha Mwinjuma Mohamed, amesema jukwaa hilo limewakutanisha wadau mbalimbali kujadili utekelezaji wa bajeti ya mwaka 2026/2027 pamoja na kutafuta suluhisho la changamoto zinazoikabili sekta ya ardhi na makazi. #Zanzibar #Ardhi #Makazi #Maendeleo #MipangoMiji #Uwekezaji #Miundombinu #ForYou #FYP #TikTokTanzania #InstaNews #TrendingNow