‘મહિને લાખ રૂપિયા આવક હોય તો પણ ઈન્ડિયામાં ના રહેવાય’

‘જો ઈન્ડિયામાં તમે મહિને લાાખ રૂપિયા કમાતા હો તો તમારી જિંદગી કોઈ રાજકારણીના નોકરથી વિશેષ કંઈ નથી, તેની સરખામણીએ જો તમે થાઈલેન્ડ જેવા દેશમાં પણ મહિને લાખ રૂપિયા કમાતા હો તો ત્યાં ઘણી સારી જિંદગી જીવી શકો..’ આ શબ્દો છે સિવિલ એન્જિનિયર એવા સિદ્ધાર્થ સિંઘ ગૌતમ નામના એક યંગસ્ટરના, જે પોતાની જાતને સ્ટોક માર્કેટના ટ્રેડર અને ઈન્વેસ્ટર તરીકે ઓળખાવે છે. છેલ્લા દસેક વર્ષમાં ઈન્ડિયાથી મોટી સંખ્યામાં લોકો વિદેશ જઈ રહ્યા છે ત્યારે ઈન્ડિયામાં એવરેજ લોકોની ક્વોલિટી ઓફ લાઈફ પર સવાલ ઉઠાવતા સિદ્ધાર્થે હાલમાં સોશિયલ મીડિયા પ્લેટફોર્મ એક્સ પર જે પોસ્ટ મૂકી છે તેના પર ખાસ્સી ચર્ચા થઈ રહી છે. ઈન્ડિયામાં મહિને લાખ રૂપિયા કમાતા લોકોની સંખ્યા ભલે કુલ વસ્તીના પાંચ ટકાથી પણ ઓછી હોય, પરંતુ સિદ્ધાર્થનું માનવું છે કે આટલી આવક હોય તો પણ ઈન્ડિયામાં રહેવાનો કોઈ મતલબ નથી, તેના બદલે બને તેટલું જલ્દી દેશ છોડી દેવામાં જ સમજદારી છે. સિદ્ધાર્થે પોતે પણ એવો દાવો કર્યો છે કે તે ઈન્ડિયા છોડીને કાયમ માટે સિંગાપોર શિફ્ટ થવા જઈ રહ્યો છે, તેની એવી પણ દલીલ હતી કે ઈન્ડિયાની પ્રદૂષિત હવામાં શ્વાસ લેવા પોતે આવક પર 40 ટકા ટેક્સ ભરવા તૈયાર નથી અને રાજકારણીઓના તમાશા જોવામાં પણ પોતાને રસ નથી. સિદ્ધાર્થે લોકોને પણ સલાહ આપતા એવું કહ્યું હતું કે જો તમારી પાસે પૈસા હોય તો ઈન્ડિયા છોડીને જતા રહો. આ યંગસ્ટરની તો એવી પણ દલીલ છે કે ઈન્ડિયામાં મહિને 50 હજાર રૂપિયા કમાતા લોકો પણ ભીખારી જેવી જિંદગી જીવે છે, જ્યારે આટલી જ આવકમાં બાલી કે પછી થાઈલેન્ડમાં રાજા જેવી જિંદગી જીવી શકાય છે.