GRUS ANTIGONE or SARUS CRANE is rare species | ក្រៀល | បក្សីទេព

GRUS ANTIGONE or SARUS CRANE is rare species | ក្រៀល | បក្សីទេព សត្វក្រៀល គឺជាសត្វស្លាបដែលមានកម្ពស់ប្រហែល ១,៥៦ ម៉ែត្រ មានទម្ងន់ ១០-១២គីឡូក្រាម និងប្រវែងស្លាបទាំងសងខាង ២,៥ ម៉ែត្រ។ ពួកវាមានម្រាមជើងមុខវែងៗចំនួន៣ និងម្រាមជើងក្រោយខ្លីមួយ។ ពួកវាមិនអាចទំនៅលើដើមឈើបានទេ ហើយដេកដោយឈរស្ងៀមធ្មឹងនៅទីតាំងជិតៗកន្លែងរកចំណីរបស់វានៃតំបន់ដីសើម។ សត្វក្រៀលមានសម្បុរប្រផេះលើដងខ្លួន កផ្នែកខាងលើនិងក្បាលមានពណ៌ក្រហម ក្បាលផ្នែកខាងលើបំផុតនិងត្រចៀក មានពណ៌ប្រផេះស្រាល។ កូនក្រៀលមានមាឌតូចបន្តិច និងមានពណ៌ត្នោតនៅចំក្បាលរបស់វា។ គេពិបាកសម្គាស់ថា សត្វក្រៀលណាជាឈ្មោល ឬញី នៅពេលដែលពួកវានៅជាគូ ប៉ុន្តែមីញីមានមាឌតូចជាងអាឈ្មោលបន្តិច។ សត្វក្រៀលត្រូវបានចាត់ជា ប្រភេទសត្វងាយរងគ្រោះនៅក្នុងបញ្ជី ក្រហម IUCN។ ការរស់នៅរបស់សត្វក្រៀលនារដូវប្រាំង (ខែធ្នូ ដល់ខែមេសា) ដែលជារដូវមិនបន្តពូជ និងត្រូវខិតខំស្វែងរកចំណី សត្វក្រៀលបានហើរផ្លាស់ទី ពីតំបន់ដែលពួកវាពងកូន ទៅរកចំណី និងដេកជាហ្វូងៗ នៅតាមតំបន់ដីសើមដែលមានទឹករាក់ៗ និងសម្បូរដោយចំណី។ ទោះបីជាសត្វក្រៀលរស់នៅជាហ្វូងក៏ដោយពួកវាក៏នៅតែរស់នៅជាក្រុមគ្រួសារផ្សេងៗគ្នា ដោយស្រែកច្រៀងដាក់គ្នាទៅវិញទៅមក។ នេះអាចជាការបញ្ជាក់ពីភក្ដីភាព របស់ពួកវា ឬបញ្ចេញសញ្ញាថាពួកវាកំពុងត្រូវបានទទួលរងការគំរាមកំហែងនានា។ ស្រែកច្រៀងត្រសងគ្នាជាញឹកញាប់ដោយស្រែកបន្តគ្នា។ ការស្រែកនេះចាប់ផ្ដើមពីអាឈ្មោល និងបន្តដោយមីញី។ នៅពេលស្រែកម្ដងៗ អាឈ្មោលតែងតែត្រដាងស្លាបទៅលើខ្នង ហើយមីញីតែងតែក្ដោបស្លាបនៅនឹងខ្លួនវា។ សត្វក្រៀនជាសត្វស្មោះនិងស្នេហា ពេលវាមានគូរវារួមរស់នៅជាមួយគ្នាអស់មួយជីវិត។ សត្វក្រៀលស៊ីរុក្ខជាតិទឹក មើមរុក្ខជាតិ សត្វឥតឆ្អឹងកង គ្រាប់ធញ្ញជាតិ (ស្រូវ) និងសត្វឆ្អឹងកងតូចៗ ត្រី កង្កែប ព្រមទាំងសត្វល្អិតជាអាហារ។ នៅប្រទេសកម្ពុជា សត្វក្រៀលជ្រើសរើសព្រៃរបោះដែលមានដីសើមសមរាប់តាំងសំបុក ហើយក្រៀលញីឈ្មោលទាំងពីររួមគ្នាធ្វើសំបុក ដែលសំបុកនោះធ្វើពីចំបើង និងស្មៅត្រែងជាដើម។ សំបុកដែលធ្វើនៅលើផ្ទៃទឹក អង្កត់ផ្ចិតរហូតដល់១ម៉ែត្រ និងកម្ពស់រហូតដល់៥០សង់ទីម៉ែត្រ ចំណែកឯស៊ុតក្រៀល គឺអាចអណ្តែតលើផ្ទៃទឹកបាន។ ជាទូទៅសត្វក្រៀលផ្ដល់កំណើតដោយមានស៊ុតចំនួន ០២គ្រាប់ តែនៅពេលខ្លះមានស៊ុតចំនួន០៣គ្រាប់ ហើយកម្រនឹងមានស៊ុត០៤គ្រាប់ណាស់។ ក្រៀលញី ឈ្មោលទាំងពីរក្រាបពង ទោះបីជាភាគច្រើនមីញីមានតួនាទីក្រាបពង រីឯអា ឈ្មោលមានតួនាទីការពារសំបុកពីការយាយីរបស់សត្រូវ។ សត្វក្រៀល ក្រាបពងរយៈពេលពី៣០ ទៅ ៣៤ថ្ងៃ ដើម្បីអោយពងវាញាស់។នៅពេលដែលកូនក្រៀលមានអាយុ៤ ឬ ៦ខែ វានឹងមានដុះស្លាបសម្រាប់ហោះហើរ និងអាចចូលក្នុងហ្វូវបាន តែវានៅតែដើរតាមមេបាវាពេញមួយឆ្នាំ ដើម្បីអោយមានភាពម្ចាស់ការលើខ្លួនវា។ គេបានកត់ត្រាថាសត្វក្រៀលអាចរស់នៅបានរហូតដល់អាយុ៤២ឆ្នាំ។ នៅក្នុងទ្វីបអាស៊ី សត្វក្រៀលគឺជានិមិត្តរូបនៃជោគវាសនាល្អ និងអាយុយឺនយូរ។ ពួកវាក៏ត្រូវបានគេគិតថាជានិមិត្តរូបនៃមនោសញ្ចេតនាស្នេហាស្ម័គ្រស្មោះ។ នៅក្នុងប្រទេសកម្ពុជា ទីតាំងដែលពួកវាធ្វើសំបុកគឺជាតំបន់ព្រៃល្បោះដែលសំបូរដោយតំបន់ដីសើម។ បច្ចុប្បន្ននេះនៅតំបន់នានានៃអាងទន្លេសាប ព្រមទាំងតំបន់ការពារទេសភាពអាងត្រពាំងថ្ម តំបន់ដែនដីសណ្ដរទន្លេមេគង្គ នៃប្រទេសកម្ពុជា តំបន់ការពារទេសភាពអន្លង់ព្រីង និងតំបន់ការពារទេសភាពបឹងព្រែកល្ពៅ គឺជាទីជម្រកដ៏សុខសាន្ដរបស់ពួកវា។ https://freshnewsasia.com/index.php/e...