Waziri mkuu achafukwa mauaji ya mtoto mwenye Ualbino, atoa maagizo mazito

Waziri Mkuu Kassim Majaliwa ametoa maagizo kwa vyombo vya usalama, viongozi wa Serikali, dini, waganga wa kienyeji, wazazi, walezi na Watanzania ikiwa ni hatua ya kukomesha vitendo vya mauaji na ukatili kwa watu wenye ualbino. Hatua hiyo inafuatia mauaji ya mtoto mwenye ualbino Asimwe Novath (2) ambaye Mei 31 mwaka 2024, aliporwa nyumbani kwao Kitongoji cha Mbale, Kijiji cha Mulamula, Kata na Tarafa ya Kamachumu, Wilaya ya Muleba, Mkoa wa Kagera na mwili wake kupatikana ukiwa umehifadhiwa katika vifungashio vya plastiki. Majaliwa ameyasema hayo leo Juni 20, 2024 wakati akitoa taarifa bungeni jijini Dodoma kuhusu kupinga ukatili dhidi ya watu wenye ualbino, likiwemo tukio la mtoto Asimwe Novath mwenye umri wa miaka miwili na nusu aliyetekwa Mei 31, 2024 mkoani Kagera ambapo mwili wake ulipatikana Juni 17.