St. Theresa's Church | රතු පල්ලිය | Kelaniya

කැලණිය රතු පල්ලියවූ කලී 1928දී ගොඩනැගූ කුඩා සා. තෙරේසා මුනීස්වරියට කැපකල ලෝකයේ ප්‍රථමයෙන්ම ඉදිවූ දේවස්ථානය කීපය අතරින් එකකි. එම දේවස්ථානය ඉදිකිරිමට අක්කර 05 රූට් 02 පර්චස් 12 ක ඉඩමක් ලබාදී ඇත්තේ ෆ්‍රැන්සිස් වීරකෝන් මහත්මයා විසිනි. එතුමා ලබාදුන් එම සරුසාර පොල්වත්තේ ප්‍රදේශයේ ජනයා වෙනුවෙන් දේවස්ථානයක් ඉදිකිරීමට ඇන්තනී කූඩෙට් එවකට කොළඹ අගරදගුරුතුමා පවරා ඇත්තේ දළුගම මීසම බාරව එවකට සිටි ප්‍රංශ ජාතික එල්. එම්. වී. තෝමස් පියතුමාටය. තෝමස් පියතුමාට එම දේවස්ථානය ඉදිකිරිමට ෆ්‍රැන්සිස් වීරකෝන් මහතාද, එවකට එම ප්‍රදේශයේ ගම් සභා මංත්‍රිවරයෙකුවූ ෆ්‍රෙඩී සමරසිංහ මහතා ඇතුළු ප්‍රදේශයේ කිතුනුවෝ සිය උපරිමයෙන් දායකවුවද අනගාරික ධර්මපාලතුමා යටතේ ක්‍රියාත්මකවූ සිංහල-බෞද්ධ ජාතිකවාදය නැගුන යුගයක සිංහල-බෞද්ධ ප්‍රදේශයක්වූ කැළණියේ නව දේවස්ථානයක් ගොඩනැගීම පහසු කටයුත්තක් නොවිනි. සියළු බාධක හමුවේ දේවස්ථානය ගොඩනැගීම ක්‍රමයෙන් මන්දගාමීවන තත්වයක් තුල තෝමස් පියතුමා ප්‍රංශය බලා පිටත්වයනුවේ දේවස්ථානය ඉදිකිරිමට අරමුදල් සපයාගැනීමට මගක් සොයාගැනීමටය. සිය සොහොයුරාගේ අප්‍රතිහත උත්සාහය දකින තෝමස් පියතුමාගේ සොහොයුරිය ප්‍රංශයේ ඔවුන් සතුවු පාරම්පරික නිවස විකුණා සිය සොහොයුරාට මුදල් ලබාදෙනුයේ ශ්‍රී ලංකාවේ කැලණියේ ෆ්‍රැන්සිස් වීරකෝන් මහතා ලබාදුන් ඉඩමේ එම ප්‍රදේශයේ ජනයා වෙනුවෙන් දේවස්ථානයක් ඉදිකිරිමටය. එකී පරිත්‍යාගය හේතුවෙන් වසර කිහිපයක් තුල ප්‍රදේශයේ ජනයාගේ නොපසුබස්නා උත්සහයක ප්‍රතිඵලයක් ලෙස 1930 ඔක්තෝම්බර් මස 11 දින මෙම දේවස්ථානය තනා නිමකර ඇත. "අලුත් පල්ලිය" නමින් ප්‍රචලිත වූ මෙම දෙව් මැදුර විවෘත කිරීමේ මංගල මහා දිව්‍ය පූජාව එවකට කොළඹ අගරදගුරුතුමාන් වූ ගරු. මාක් ප්‍රනාන්දු රදගුරු හිමිපාණන් විසින් පවත්වා ඇත. පැරැන්නන්ගේ මතයට රදගුරුතුමන්ව පෑලියගොඩ සිට අශ්ව රථ පෙරහැරකින් දෙව් මැදුර කරා වැඩම කර ඇත. දෙව් මැදුරෙහි ප්‍රථම විවාහය දිව්‍ය පූජාව ලෙස 1931 ඔක්තෝම්බර් මස 26 වන දින පැවති කැළණිය නිවැසි ලුසී විනිෆ්‍රඩ් යුප්‍රේසියා සමරසිංහ මෙනෙවියගේ විවාහයත් ප්‍රථම අවමංගල උත්සවය හැටියට ක්‍රිස්ටෝපර් අමරසේකර මහතාගේ අවමංගල උත්සවයත් සදහන් කළ හැක. කැළණිය සා. තෙරේසා දේවස්ථානයෙන් කතෝලික සභාව අස්වැද්දීම සඳහා පූජක පුතුන් දෙදෙනෙක් දායාද කර ඇති අතර, 2003 සැප්තැම්බර් මස 13 වන දින ප්‍රථම පූජක පුතු ලෙස ගරු. රුවන් රීඩ් ලියනගේ පියතුමන්ද, 2019 ජුනි මස 01 වන දින දෙවන පූජක පුතුන් ලෙස ගරු. අසිත් චාමර පියතුමන් ද පූජාත්වරය ලබා ගනිමින් අප ඉතිහාසය සනිටුවන් කළේය දේවස්ථානයට ඉඩම ලබාදුන් ෆ්‍රැන්සිස් වීරකෝන් මහතාටත් ප්‍රදේශයේ ජනතාවටත් අවශ්‍යව පැවැතියේ අභිනවයෙන් ඉදිකල මෙම දේවස්ථානය දේවමාතාවන්ට කැපකිරීමටය. ප්‍රංශ ජාතික එල්. එම්. වී. තෝමස් පියතුමා එහිලා කෙතෙක් කැපවී සිටියේද යත් ප්‍රංශයේ රොකොකෝ ශෛලීයට අයත් දේවමාතාවන්ගේ සුරුවමක්ද දේවස්ථානයට රැගෙනවිත් තිබුණි. එම ප්‍රතිමාව අද ද නිල් පැහැයෙන් එම දේවස්ථානයේම තිබේ. එහෙත් වයස 15දි පැවිදිවියට පත් ජෙසුගේ කුඩා මල ලෙස හැදින්වූ සරල, චාම්, භක්තිමත් දිවියක් ගෙවු කුඩා තෙරේසා මුනිස්වරිය වයස 24ක තරුණ වියේදීම ස්වර්ගථවීමත්, එතුමිය 1925 මැයි 17 දින එකලොස්වන පියුස් පාප්තුමා විසින් සාන්තුවරයට එසවූ පුවතත් ගම් නියම්ගම් පුරා ලැව්ගින්නක් මෙන් පැතිර ගියේය. එම පුවත පැරණි කොළඹ - නුවර පාරේ හත්වන සැතපුම් කණුව අසල ෆ්‍රැන්සිස් වීරකෝන් මහතා ලබාදුන් ඉඩමේ අභිනවයෙන් ඉදිකල දේවස්ථානයටත්, ප්‍රදේශයේ කිතුනුවන්ටත් දැනවුයේ මහත් උද්‍යෝගයකි. එකී උද්‍යෝගය අමන්දානන්දයට පත්කරමින් ජෙසුගේ කුඩා මල වන සා.තෙරේසා මුනිවරිය ජෙසුතුමා සහ මරියතුමිය ඉදිරියේ සා. තෙරේසා යදින ස්ටෙන් ග්ලාස් ව්දුරු චිත්‍රයක්ද සා. තෙරේසා මුනිවරියගේ එක් කුස උපන් සොහොයුරිය විසින් මෙම මීසම්වාසී ජනයාට එවා තිබුණි. මෙම දේවස්ථානය ජෙසුගේ කුඩා මල වන තෙරේසා මුනිස්වරිය නමින් නම් කරන්නේ එවැනි පසුබිමකය. එම වීදුරු චිත්‍රය අද ද අල්තාරයට ඉහලින් තිබේ. මෙකී දේවස්ථාන භූමියට 2012 අප්‍රේල් මස 28 දින සුවිසල් මීසම් ශාලාවක්ද, 2024 අප්‍රේල් මස 27 වන දින පියතුමන්ලාට නවාතැන් ගැනීම්ට මීසම් ගෘහයක්ද සාදා මතු පරම්පරාවට දායාද කර ඇත. කැළණි නදිය අසබඩ විරාජමානව ගරු ගාම්භීරව අහස උසට නැගි මෙකී දෙවස්ථානය දෙවිදුන්ගේත් බැතිමතුන්ගේත් අභිමානය කියා පායි. කැලණිය සා. තෙරේසා දේවස්ථානය වසර 95 ප්‍රෞඪ ඉතිහාසයකට හිමිකම් කියන අතර වර්ෂ 2030 දී ශතවර්ෂ සැමරුම සැමරීමට නියමිතය. #STCMedia