ರಸಗೊಬ್ಬರ ಸಮಸ್ಯೆಗೆ ಕೇಂದ್ರ ಸರ್ಕಾರ ಪರಿಹಾರ | ಫ್ರೇಮ್ ವರ್ಕ್ ಫಾರ್ ಫರ್ಟಿಲೈಸರ್ ಸೇಲ್ ಆಪ್‌

ರಸಗೊಬ್ಬರಕ್ಕಾಗಿ ಗಂಟೆಗಟ್ಟಲೆ ಕ್ಯೂ ನಿಲ್ಲುವ, ಮಳಿಗೆಗಳಿಗೆ ಅಲೆಯುವ ಬದಲು ರೈತರು ಮನೆಯಲ್ಲೇ ಕುಳಿತು ತಮಗೆ ಬೇಕಾದ ರಸಗೊಬ್ಬರವನ್ನು ಮುಂಗಡವಾಗಿ ಕಾಯ್ದಿರಿಸುವ ಅವಕಾಶವನ್ನು ರೈತರಿಗೆ ಒದಗಿಸಿಕೊಡಲಾಗಿದೆ. ಈ ಕುರಿತು ಒಂದು ವರದಿ. ಮೊಬೈಲ್ ಸ್ಕ್ರೀನ್ ಮೇಲೆ ಒಟಿಪಿ ನಮೂದಿಸುತ್ತಿರುವ ರೈತ.. ರಸಗೊಬ್ಬರದ ಅಂಗಡಿಯಲ್ಲಿ ಬುಕಿಂಗ್ ವಿವರ ತೋರಿಸಿ, ಗೊಂದಲವಿಲ್ಲದೆ ರಸಗೊಬ್ಬರ ಪಡೆಯುತ್ತಿರುವ ಗ್ರಾಹಕರು.,, ರಸಗೊಬ್ಬರವನ್ನು ಸಕಾಲದಲ್ಲಿ ಬೆಳೆಗಳಿಗೆ ಹಾಕುತ್ತಿರುವ ಕೃಷಿಕರು…. ಈ ದೃಶ್ಯಗಳು ಕಂಡುಬಂದಿದ್ದು ತುಮಕೂರು ಮತ್ತು ಕೋಲಾರ ಜಿಲ್ಲೆಗಳಲ್ಲಿ… ಕೇಂದ್ರ ಸರ್ಕಾರ ರಸಗೊಬ್ಬರ ವಿತರಣೆಯಲ್ಲಿನ ಕೃತಕ ಅಭಾವ ಹಾಗೂ ಗೊಂದಲಗಳನ್ನು ಸಂಪೂರ್ಣವಾಗಿ ತಪ್ಪಿಸುವ ಉದ್ದೇಶದೊಂದಿಗೆ ‘ ಫ್ರೇಮ್ ವರ್ಕ್ ಫಾರ್ ಫರ್ಟಿಲೈಸರ್ ಸೇಲ್ ’ ಆಪ್ ಎಂಬ ಹೊಸ ತಂತ್ರಾಂಶದಿಂದ ಇವೆಲ್ಲವು ಸಾಧ್ಯವಾಗಿವೆ. ಅರ್ಹ ಫಲಾನುಭವಿಗಳಿಗೆ ಸಕಾಲದಲ್ಲಿ ರಸಗೊಬ್ಬರ ತಲುಪುವಂತೆ ಮಾಡಿ, ಕೃಷಿ ವಲಯದಲ್ಲಿ ಪಾರದರ್ಶಕತೆ ತರುವುದು ಕೇಂದ್ರ ಸರ್ಕಾರದ ಗುರಿಯಾಗಿದೆ. ರೈತರು ತಮ್ಮ ಸ್ಮಾರ್ಟ್‌ಫೋನ್‌ನಲ್ಲಿ ‘ ಫ್ರೇಮ್ ವರ್ಕ್ ಫಾರ್ ಫರ್ಟಿಲೈಸರ್ ಸೇಲ್ ’ ಅಪ್ಲಿಕೇಶನ್ ಡೌನ್‌ಲೋಡ್ ಮಾಡಿಕೊಂಡು, ಆಧಾರ್ ಸಂಖ್ಯೆ ಹಾಗೂ ಒಟಿಪಿ ಮೂಲಕ ಸುಲಭವಾಗಿ ನೋಂದಾಯಿಸಿಕೊಳ್ಳಬಹುದು. ಲಾಗಿನ್ ಆದ ನಂತರ ತಮಗೆ ಅಗತ್ಯವಿರುವ ಗೊಬ್ಬರದ ಪ್ರಮಾಣವನ್ನು ಆಯ್ಕೆ ಮಾಡಿ ಮುಂಗಡವಾಗಿ ಬುಕ್ ಮಾಡಬಹುದು. ಈ ಡಿಜಿಟಲ್ ವ್ಯವಸ್ಥೆಯಿಂದಾಗಿ ರೈತರು ಗೊಬ್ಬರ ಮಳಿಗೆಗಳಿಗೆ ಅನಗತ್ಯವಾಗಿ ಅಲೆಯುವುದು ಮತ್ತು ಸಮಯ ವ್ಯಯಿಸುವುದು ತಪ್ಪಲಿದೆ. ರಸಗೊಬ್ಬರವನ್ನು ಬುಕ್ ಮಾಡಿದ ಎರಡು ದಿನಗಳ ಒಳಗೆ ನೇರವಾಗಿ ಅಂಗಡಿಗೆ ತೆರಳಿ, ಸರತಿ ಸಾಲಿನಲ್ಲಿ ನಿಲ್ಲದೆ ರಸಗೊಬ್ಬರ ಪಡೆಯಬಹುದಾಗಿದೆ. ಭೂಮಿ ಮತ್ತು ಬೆಳೆಗಳ ದತ್ತಾಂಶಕ್ಕೆ ಈ ಆಪ್ ಲಿಂಕ್ ಆಗಿರುವುದರಿಂದ, ಕಾಳಸಂತೆಕೋರರು ಮತ್ತು ಮಧ್ಯವರ್ತಿಗಳ ಹಾವಳಿಗೆ ಕಡಿವಾಣ ಬಿದ್ದಿದೆ. ಅಲ್ಲದೆ ಯಾವ ಬೆಳೆಗೆ ಎಷ್ಟು ಗೊಬ್ಬರ ಹಾಕಬೇಕು ಎಂಬ ಸಲಹೆಗಳೂ ಇಲ್ಲಿವೆ. ಗೊಬ್ಬರದ ಅನಗತ್ಯ ದಾಸ್ತಾನು ತಡೆಯುವ ಮೂಲಕ ಕೃತಕ ಅಭಾವ ಸೃಷ್ಟಿಸುವವರ ವಿರುದ್ಧ ಇದು ಪ್ರಮುಖ ಅಸ್ತ್ರವಾಗಿದೆ. ದೂರದರ್ಶನದೊಂದಿಗೆ ರೈತ ನರಸಿಂಹಪ್ಪ, ತಾವು ಅಪ್ಲಿಕೇಶನ್ ಡೌನ್‌ಲೋಡ್ ಮಾಡಿಕೊಂಡೇ ಗೊಬ್ಬರ ಖರೀದಿಸಲಾಗಿದೆ. ಇದರಿಂದ ಮಳಿಗೆಗಳಿಗೆ ಅಲೆಯುವ ತಾಪತ್ರಯ ತಪ್ಪಿದ್ದು, ಓಡಾಟದ ಹಣ ಮತ್ತು ಸಮಯ ಎರಡೂ ಉಳಿತಾಯವಾಗಿದೆ ಎಂದರು. ಕೈದಾಳ ಗ್ರಾಮದ ರೈತ ಮಹಿಳೆ ಗೌರಮ್ಮ, ಮೂರು ಮೂಟೆ ರಸಗೊಬ್ಬರವನ್ನು ಆಪ್ ಮೂಲಕವೇ ಬುಕ್ ಮಾಡಲಾಗಿತ್ತು. ಈಗ ಅವುಗಳನ್ನು ಪಡೆಯಲಾಗಿದೆ. ಈ ತಂತ್ರಾಂಶದಿಂದಾಗಿ ನಮಗೆ ರಸಗೊಬ್ಬರ ಸಿಗುವುದಿಲ್ಲ ಎನ್ನುವ ಭೀತಿ ದೂರಾಗಿದೆ ಎಂದು ತಿಳಿಸಿದರು. ನಾಗಲಮಡಿಕೆ ಹೋಬಳಿ ಕೃಷಿ ಅಧಿಕಾರಿ ಷಂಶಾದ್ ಉನ್ನೀಸ್, ಕೇಂದ್ರ ಸರ್ಕಾರದ ಈ ಹೊಸ ಅಪ್ಲಿಕೇಶನ್ ಕಾಳಸಂತೆಕೋರರನ್ನು ಸಮರ್ಥವಾಗಿ ನಿಯಂತ್ರಿಸಿದೆ. ಸಹಾಯಧನ ಯುಕ್ತ ಗೊಬ್ಬರವು ನೇರವಾಗಿ ನೈಜ ಫಲಾನುಭವಿ ರೈತರಿಗೆ ತಲುಪುವಂತೆ ಇದು ಮಾಡುತ್ತದೆ ಎಂದು ಹೇಳಿದರು. ಪಾವಗಡ ತಾಲೂಕಿನ ಸಹಾಯಕ ಕೃಷಿ ನಿರ್ದೇಶಕ ಆರ್. ಅಜಯ್ ಕುಮಾರ್ , ರೈತರು ಮೊಬೈಲ್‌ನಲ್ಲೇ ಆಧಾರ್ ಮತ್ತು ಒಟಿಪಿ ನೀಡಿ ಮುಂಗಡ ಬುಕಿಂಗ್ ಮಾಡಬಹುದು. ಬುಕ್ ಮಾಡಿದ ಎರಡು ದಿನಗಳ ಒಳಗೆ ಯಾವುದೇ ಗೊಂದಲವಿಲ್ಲದೆ ಗೊಬ್ಬರ ಪಡೆಯಲು ಅವಕಾಶವಿದೆ ಎಂದು ಮಾಹಿತಿ ನೀಡಿದರು. ತುಮಕೂರು ಜಿಲ್ಲಾ ಜಂಟಿ ಕೃಷಿ ನಿರ್ದೇಶಕ ಲಕ್ಷ್ಮಣ ಎಸ್. ಕಳ್ಳೇನ್ನವರ್, ಕೇಂದ್ರ ಸರ್ಕಾರ ರೂಪಿಸಿರುವ ಈ ತಂತ್ರಾಂಶದಿಂದ ರೈತರ ರಸಗೊಬ್ಬರ ಸಮಸ್ಯೆಗೆ ಪರಿಹಾರ ಸಿಗಲಿದೆ ಎಂದು ತಿಳಿಸಿದರು. ಒಟ್ಟಿನಲ್ಲಿ ತಂತ್ರಜ್ಞಾನದ ಅಳವಡಿಕೆಯಿಂದಾಗಿ ರಸಗೊಬ್ಬರ ಪಡೆಯಲು ರೈತರಿಗೆ ಪ್ರತಿವರ್ಷ ಎದುರಾಗುತ್ತಿದ್ದ ಸಮಸ್ಯೆಯೊಂದು ಪ್ರಾಯೋಗಿಕವಾಗಿ ದೂರವಾಗಿದೆ. ಈ ಡಿಜಿಟಲ್ ರಸಗೊಬ್ಬರ ವಿತರಣಾ ವ್ಯವಸ್ಥೆಯು, ಅನ್ನದಾತನ ಶ್ರಮವನ್ನು ಕಡಿಮೆ ಮಾಡಿ ಅವರ ಬದುಕಿಗೆ ಹೊಸ ಭರವಸೆ ನೀಡಿದೆ. #LiveDDChandanaNews #DDChandanaNews #DDChandana #DDKannada