Musiqi Niyə Haramdır? | Hansı Musiqiləri Dinləmək Olar? | Şeyx Lətif Nəcəf (h)

Whatsapp Kanalımıza Daxil Olun 🔔✅️ https://whatsapp.com/channel/0029VbAd... Musiqi və mahnı dinləmək bütün alimlərin ittifaqı ilə haramdır. Onun haram olmasına dair dəlil Qurani-Kərimdən və Peyğəmbərimiz (sallallahu əleyhi və alih) ilə onun pak Əhli-Beytindən (əleyhimus-salam) gələn hədislərdən götürülmüşdür. Qurani-Kərimdə bu barədə dəlil belədir: “İnsanlar içərisində eləsi də vardır ki, (özünü və başqalarını) Allahın yolundan azdırmaq üçün əyləncə üçün sözlər alar, (haqqı) bilmədən məsxərəyə qoyar. Onlar üçün alçaldıcı bir əzab vardır. Ayələrimiz ona oxunduqda isə, təkəbbür göstərərək (sanki) onları eşitmirmiş kimi üz döndərər. Elə bil qulaqlarında bir ağırlıq var. Ona (beləsinə) ağrılı bir əzabla müjdə ver.” (Loğman surəsi, 6-7) "Ləhv" (لهو) – insanı əhəmiyyətli şeylərdən yayındıran şeylərə deyilir. "Ləhvul-hədis" isə – haqqdan uzaqlaşdıran söz və əyləncələrə, məsələn, nəğmə ilə şeir oxumaq, musiqi alətləri ilə əylənmək, əxlaqsızlığa çağıran uydurma hekayələr və s. aiddir. Bütün bunlar "ləhvul-hədis" anlayışına daxildir. Ayədəki "Allahın yolu"ndan məqsəd Qurani-Kərim və onun ehtiva etdiyi haqq maarifdir. Musiqi və bu kimi şeylərlə məşğul olan şəxs Qurana etinasız yanaşır, İslam maarifini öyrənməyə maraq göstərmir və elə bir mərhələyə çatır ki, artıq Qurana qulaq asmaq istəmir. Bu günlərdə biz bunun canlı nümunəsini gözlərimizlə görürük: bəzi insanlar ləhvul-hədisə (yəni mahnı və musiqiyə) o qədər bağlanıblar ki, onları daim radiodan, televizordan və digər vasitələrdən musiqi dinləməyə yönəlmiş halda görürsən. Amma Quran tilavətinin vaxtı çatanda isə cihazı söndürür və Allah-Təalanın kəlamına qulaq asmaqdan üz çevirirlər. Bu da Qurandakı o mübarək ayənin canlı təzahürüdür: "Ayələrimiz ona oxunduqda isə, təkəbbür göstərərək üz döndərər..." Hər halda, mahnı və musiqi dinləməyin haram olmasına dair şəriət mətnlərində kifayət qədər açıq və güclü dəlillər vardır. "Ləhvul-hədis" musiqi və mahnını da əhatə edir. Bu, Peyğəmbərdən (sallallahu əleyhi və alih) Əbu Ümamə vasitəsilə nəql edilən bir hədisdə də aydın şəkildə bildirilmişdir. O Həzrət buyurmuşdur: "Müğənniləri öyrətmək və onları satmaq halal deyil. Onların qazancı haramdır. Allahın Kitabında bu barədə nazil olan ayə bunu təsdiq edir: “İnsanlar içərisində eləsi də vardır ki, əyləncə üçün sözlər alar...”" Həmçinin İmam Baqir (əleyhis-salam) buyurmuşdur: "Quranda cəhənnəmlə vəd olunan şeylərdən biri də mahnıdır." – sonra da yuxarıdakı ayəni tilavət edib buyurdu: "Ləhvul-hədisə musiqi və mahnı da daxildir." Bu açıq-aşkar dəlillərə əlavə olaraq başqa hədislər də nəql olunmuşdur: Peyğəmbər (sallallahu əleyhi və alih) buyurmuşdur: "Qiyamət günü tanbur (çalğı aləti) sahibi qapqara bir sifətlə dirildiləcək. Əlində oddan bir tanbur olacaq. Başının üzərində yetmiş min mələk olacaq və onların hər birinin əlində dəmir çomaq olacaq – onun başına və üzünə vuracaqlar. Mahnı oxuyan qəbrindən kor, kar və lal halda dirildiləcək. Zinakar da belə dirildiləcək. Zurna (mızmar) və dəf çalan da bu vəziyyətdə olacaq." Bu hədislərdən və ayələrdən açıq şəkildə anlaşılır ki, musiqi və mahnı insanı Allahdan və Qurandan uzaqlaşdırır və əbədi əzabla nəticələnən böyük günahlardandır.