Takroriy ekinlarni ekishda zamonaviy texnologiyalar amalda

Mirzacho‘l SIU hududidagi “Quyoshli vodiy” fermer xo‘jaligida fermerlar va soha mutaxassislari ishtirokida takroriy ekinlarni joylashtirish bo‘yicha amaliy-ko‘rgazmali seminar o‘tkazildi. Seminarda tuman hokimi B.K. Mirzakulov g‘alladan bo‘shagan maydonlarga zamonaviy seyalkalar yordamida yerga qayta ishlov bermasdan mosh va boshqa takroriy ekinlarni ekish texnologiyasini amaliy tarzda tushuntirib berdi. Qayd etilganidek, Jizzax viloyati hokimi Ulug‘bek Mustafoyevning tashabbusi va amaliy takliflari asosida Xitoy mutaxassislari hamkorligida tayyorlangan ushbu seyalkalar vaqt va mablag‘ni tejash, tuproqdagi namlikni saqlash hamda hosildorlikni oshirishga xizmat qiladi. Seminarda qishloq xo‘jaligidagi innovatsion yondashuvlardan biri bo‘lgan yer osti tomchilatib sug‘orish texnologiyasining afzalliklari ham keng tushuntirildi. Mazkur tizimda tomchilatish shlanglari yer ostiga joylashtirilgan bo‘lib, bir maydonda ketma-ket paxta, bug‘doy va takroriy ekinlarni yetishtirish jarayonida shlanglarni qazib olish yoki qayta yotqizishga ehtiyoj qolmaydi. Natijada yerga ortiqcha ishlov berish, yoqilg‘i sarfi va texnika xarajatlari keskin kamayadi. Shuningdek, ushbu texnologiya orqali suv, mineral o‘g‘itlar hamda zarur preparatlar maxsus tizim yordamida bevosita o‘simlik ildiz qismiga yetkaziladi. Bu esa resurslarning isrof bo‘lishining oldini olib, ularning o‘zlashtirilish samaradorligini oshiradi. Chopiq va yagana kabi qo‘shimcha ishlar hajmi kamayib, mehnat unumdorligi ortadi. Ta’kidlanganidek, Jizzax tajribasi asosida joriy etilayotgan ushbu innovatsion texnologiya suvni tejash, xarajatlarni qisqartirish, ishchi kuchiga bo‘lgan ehtiyojni kamaytirish hamda yuqori hosildorlikka erishishda muhim omil bo‘lib xizmat qilmoqda. Mutaxassislar ushbu texnologiya orqali fermerlar har gektardan qo‘shimcha iqtisodiy samara olishlari, takroriy ekinlarni erta ekish hisobiga esa hosildorlikni yanada oshirishlari mumkinligini ta’kidladi. Tadbir yakunida nuroniylar tomonidan dehqonlar mehnatiga rivoj va baraka tilab duolar qilindi. Darhaqiqat, zamonaviy texnologiya, oqilona yondashuv va o‘z vaqtida bajarilgan agrotexnik tadbirlar — mo‘l hosilning muhim omilidir. 🔍Quyidagi havolani bosing va Mirzacho'l tumani hokimligi telegram kanaliga qo'shiling👇👇👇 ❤ 👉https://t.me/Mirzachultumani 🌐Web-site |📘facebook | ▶️youtube |📲telegram |