Атырау облысындағы Ойыл, Жем, Сағыз өзендері мүлде жойылудың алдында тұр

Атырау облысындағы Ойыл, Жем, Сағыз өзендері экологиялық апаттың алдында тұр. Аймақтағы тіршіліктің күре тамыры іспетті өзендер мүлде жойылып, өзен бойын жағалап отырған ел сусыз қалуы мүмкін. Мұны жауапты органдар табиғи құбылыс деп отыр. Ал жергілікті халық өзеннің түгесілуіне адами фактордың әсер еткеніне сенімді. Биліктегі табиғатты қорғаушылардан үміттері үзілген Атырау облысы Қызылқоға ауданының белсенділері қолдарына дрон құрылғысын алып, Ойыл өзенінің бастауынан бастап бейнежазбаға түсірген. Сөйтіп, Ақтөбе облысы аумағынан Ойыл өзенінің бойына қойылған 40-қа жуық заңсыз бөгетті анықтапты. Ойылдың бойын жайлаған Атырау облысы Қызылқоға ауданының халқы соңғы жылдары судан әбден тарықты. Биыл ғана азын-аулақ су келіп жатыр. Бұған дейін сай-сала құрғап, шаруалардың күнкөрісі қиындаған. Ел талай жыл табиғат қорғаушыларынан да көмек сұрады. Бірақ еш нәтиже болмаған соң, белсенді азаматтар себебін білу үшін мәселені өз қолдарына алған. Олар Ақтөбе облысынан бастап арна бойымен дрон ұшырып, 40-қа жуық заңсыз бөгетті анықтапты. ЕСЕНБАЙ НҰРОВ, Атырау облысы Қызылқоға ауданы тұрғыны: – Біз Қызылқоға ауданы жанашырлары, Ойыл жанашырлары Мұғалжар, Темір, Ойыл, Қобда ауылының азаматтары осы мәселені көтеріп келеміз. Мақсатымыз Ойыл өзенінің тартылу себептерін анықтау болатын. Сол үшін 2 рет экспедиция, 3 рет конференция ұйымдастырдық. Ойыл өзенінің тартылуы құрғақшылықтан емес екенін аңғардық. Иесіз бөгеттің өзі 40-тан үстіне шығып тұр. Бұл дегенің Ойыл өзенінің бассейніне құятын барлық сайлар, жыралар тегістей бітеліп жатыр. Қызылқоғалықтардың айтуынша кейбір арналарды ақтөбелік кәсіпкерлер бөгеп алса, кейбірі Кеңес кезеңінен бері болуы мүмкін. Алайда су ресурстарын бақылаушы орган бұл бөгеттер бұрын болмаған дейді. Айтуларынша бұл заңсыздықтарды атқарушы органдар анықтауы тиіс екен. ҒАЛИДОЛЛА АЗИДУЛЛИН, Су ресурстарын пайдалануды реттеу және қорғау жөніндегі Жайық-Каспий бассейндік инспекциясының басшысы: – Әлеуметтік желіде шыққан бөгеттер бойынша тізімдемесін жасадық. Ақтөбе облысының ресми орындарына ресми хат жолдадық. Бұл бөгеттерді бұзу жөнінде. Себебі Ақтөбе облысы әкімдігімен 2021 жылдың 1 қаңтарына жасақталған интерактивті құрылғылардың тізбесі бар. Сол тізбелердің ішінде бұл бөгеттердің ешбірі көрсетілген жоқ. Сонда бізде де мәлімет жоқ, Ақтөбе облысының жергілікті атқарушы органдарында да бұл туралы мәлімет жоқ. Ақтөбе облысы әкімдігі атыраулық белсенділердің бейнежазбасынан бейхабар секілді. Өйткені Ойыл бойында бөгет жоқ деп отыр. Дейтұрғанмен жуықта экспедицияға шығады екен. БОЛАТ ТАСБОЛАТОВ, Ақтөбе облысы Табиғи ресурстар басқармасының бөлім басшысы: – Ойыл өзенін бөгеп тұрған бөгет жоқ. Жұма күні су ресурстар комитетінің басшысы орынбасары, Жайық-Каспий инспекциясының басшысы және табиғи ресурстар басшысы келеді. Біз сол бөгеттерді зерттейміз. Нақты бар ма? Жоқ па? Қашан салған? Кім салғанын? Экспедицияға шығамыз. Өзеннің бойындағы бөгеттердің бейнежазбасы Экология, геология және табиғи ресурстар министрлігіне дейін жеткен. Министрліктегілер де бұл бөгеттердің коммуналдық меншікте жоқтығын, сондықтан Ақтөбе облысына арнайы комиссия жіберіп заңсыз бөгеттерді жоюға тапсырма берілгендігін айтты. Сондай-ақ, бұл комиссия тек Ойылды ғана емес, өңірдегі Жем және Сағыз өзендерінің жағдайымен де танысады екен. Жанат Молдашова, Жанар Қожанова, Фархад Тәжібаев Бізді әлеуметтік желіде оқыңыздар: Youtube -   / @informburo31kanal   Facebook -   / informburo31   Instagram -   / informburo31   Vkontakte - https://vk.com/informburo31 TikTok - www.tiktok.com/@informburo31 WhatsApp Информбюро +7 777 331 31 31 #экологиялық_апат #Атырау #Ойыл #Сағыз #Жем