MBOZI YAONGOZA UKUSANYAJI MAPATO,MOMBA YASHINDWA KUFIKIA LENGO

Songwe, 15 Mei 2025 – Mkuu wa Mkoa wa Songwe, Mhe. Daniel Chongolo, ameongoza na kufungua rasmi kikao cha tathmini ya utekelezaji wa utendajikazi wa Mamlaka za Serikali za Mitaa (Halmashauri) kilichofanyika katika ukumbi wa mikutano wa ofisi ya Mkuu wa Mkoa wa Songwe, Nselewa – Mlowo, Wilaya ya Mbozi. Katika kikao hicho, Mhe. Chongolo alitoa pongezi kwa Halmashauri ya Mbozi, Mji wa Tunduma na Ileje kwa kuvuka lengo katika ukusanyaji wa mapato. Hata hivyo, alizitaka Halmashauri za Momba na Songwe kuongeza juhudi, akibainisha kuwa bado ziko chini ya lengo kwa kufikia asilimia 85.75 tu. “Kuna vyanzo vimekusanya chini ya malengo na vingine havijakusanya kabisa tangu kuanza kwa mwaka wa fedha. Nitoe rai kwa Halmashauri kuhakikisha kuwa kila chanzo cha mapato kinakusanywa kwa asilimia mia moja au zaidi ifikapo Juni 30, 2025 – mwisho wa mwaka wa fedha wa 2024/2025,” alisisitiza Mhe. Chongolo. Aidha, Mkuu wa Mkoa alieleza umuhimu wa kusimamia kwa ufanisi miradi ambayo tayari imepokea fedha, akisema kuwa “miradi inayoletwa fedha, matokeo ndio matarajio ya kila mmoja. Tukishindwa kuyafikia matokeo, maana yake tumeshindwa kutimiza dhamira ya anayeleta fedha, lakini pia tumeshindwa kutimiza matarajio ya wananchi.” Kikao hiki ni sehemu ya juhudi za Serikali ya Mkoa wa Songwe katika kuhakikisha uwajibikaji na ufanisi katika ukusanyaji wa mapato na utekelezaji wa miradi ya maendeleo kwenye Halmashauri.