MWANAFUNZI WA SHERIA SAUT AKAMATWA NA KADI 20 ZA ATM, VYETI 35 NA MIKATABA YA MIKOPO

Wakati wengi wakiamini kuwa maisha ya mwanafunzi wa sheria yanazunguka vitabu, mihadhara na maandalizi ya taaluma ya kutetea haki, kwa mwanafunzi mmoja wa mwaka wa nne katika Chuo Kikuu cha SAUT jijini Mwanza, simulizi yake imechukua mkondo tofauti. Silence Joseph Mwakasala (25), mwanafunzi wa Shahada ya Sheria katika Chuo Kikuu cha SAUT, sasa anashikiliwa na Jeshi la Polisi Mkoa wa Mwanza kwa tuhuma za kuendesha biashara ya ukopeshaji fedha bila kibali cha kisheria. Safari ya kufichuka kwa tukio hilo ilianza Juni 10, 2026 baada ya polisi kupokea taarifa za kuwepo kwa nyaraka mbalimbali za watu katika mazingira yaliyoibua mashaka ndani ya duka la vifaa vya shule lijulikanalo kama Tukuyu Stationery, lililopo eneo la Nyamalango, Luchelele, wilayani Nyamagana. Taarifa hizo zilieleza kuwa ndani ya duka hilo kulikuwa na nyaraka za elimu na kadi za benki za watu tofauti, jambo lililozua maswali kuhusu matumizi yake. Baada ya kufuata taratibu za kisheria na kufanya upekuzi, polisi walibaini kile walichokieleza kuwa ni ushahidi wa shughuli za ukopeshaji fedha zinazodaiwa kuendeshwa kwa njia isiyo rasmi. Ndani ya duka hilo, polisi walikamata kadi 20 za ATM kutoka benki mbalimbali, vitambulisho viwili vya NIDA, vyeti 31 vya kidato cha nne, vyeti vinne vya kidato cha sita pamoja na mikataba mbalimbali ya mikopo. Kwa mujibu wa Kamanda wa Polisi Mkoa wa Mwanza, Wilbroad Mutafungwa, mtuhumiwa alikiri wakati wa mahojiano kuwa mbali na masomo yake ya sheria, alikuwa akitoa mikopo kwa wanafunzi na baadhi ya wakazi wa eneo hilo. Kamanda huyo alisema mtuhumiwa alikuwa akichukua nyaraka muhimu za wakopaji ikiwemo vyeti vya elimu, vitambulisho na kadi za benki kama dhamana ya fedha alizokuwa akiwakopesha.