Қызыл жарма ауылындағы №144 мектепке қатысты дауға соңғы нүкте қойылды

Қызылорда облысына қарасты, Қызыл жарма ауылындағы №144 мектепке қатысты дауға соңғы нүкте қойылды. Қызылорда қалалық соты, ауыл ақсақалдары мен мектепте жүйе технигі болып жұмыс істеген азаматшаның, мектеп директорына қатысты шағымын теріске шығарды. Яғни, сот, «аталған азаматтар ар-ожданыма кір келтіріп, іскерлік беделімді түсірді» деп моральдық шығын өндіруді талап еткен мектеп басшысы Балайым Ниязбекованың талап-арызын қанағаттандырды. Естеріңізде болса, біздің арнамызға аталған мектеп директорының үстінен ауыл ақсақалдары мен мектептің бұрынғы жүйе технигі шағымданған болатын. Бірақ, сот, Нұрсәуле Қуанышева мен олардың туған-туыстарының "жұмысқа орналастыру үшін ақша жинады" деген және өзге де арыз-шағымдарын негізсіз деп тауып, Балайым Ниязбекова қайтадан директорлық қызметін жалғастыру керек деп шешті. Бұған қоса, оларға Балайым Ниязбековадан кешірім сұрауды және келтірілген моральдық шығынды өтеуді сот міндеттеді. МЕЙІРБЕК ДАУЫЛБАЕВ, Балайым Ниязбекованың қорғаушысы: Қалған жауапкерлер жөніндегі әрекеттері сот барысында толығымен өзінің дәлелін тауып, бүгінгі күні соттың шешімімен талапкер Ниязбекова Балайымның азаматтық құқықтары қалпына келтірілді деп айтуға толық мүмкіншілік бар.