حوارت توق: ما تجتمع العبودية والجن إلا في عاشق

الموقع الرسمي لتوق http://touq.tv صفحة الفيسبوك   / toooq   قوت: أنت اسمك سالم .. ولاّ سدران ؟ سدران: ناس يدعوني سالم .. وناس سدران .. قوت: قلي .. يسرك أني ما أشوفك؟ سدران: يسرني أكثر لو تشوفين. قوت: من ولدت وأنا عميا .. وما لقيت من يشرح لي وش هو الشوف ..!! سدران: الشوف .. الشوف مثل يد ثالثة للإنسان .. تلمس وتميز اللي ما تقدر تميزه اليدين .. قوت: مثل ايش؟ سدران: مثل الألوان .. والأشكال .. والنور والظلام .. قوت: مادام الشوف يد.. اكيد له أصابع وأظافر..!! قوت: وين يدك الثالثة هالحين ..؟؟ سدران: لا .. لا .. أقصد .. قوت: ما عليه .. ناظرني زين يا سدران وقلي.. ليه تبي تزوجني ..؟ سدران: الصحيح .. أن والدتي هي اللي ودها أني أتزوج .. قوت: آه .. وما لقت مرة بتتزوجك إلا عميا مثلي ..! سدران: يجوز.. لكن ما كل من يبصر يشوف .. قوت: وشلون قل لي؟ سدران: الجمال والقبح نتعلمه أكثر من أنا نشوفه. قوت: عجل وش نفع البصر ؟ سدران: نفعه إننا نشوف اللي نتعلمه .. قوت: وش رأيك فيني؟ سدران: اسألي أمي! قوت: وأنت مالك رأي؟ سدران: لا .. العبد .. واللي داخله جن.. ما لهم رأي .. قوت: وأنت أيهم .. عبد أو داخلك جن؟ سدران: أنا كلهم .. قوت: آه .. أنت عاشق .. سدران: وش دراك ؟ قوت: ما تجتمع العبودية والجن إلا في عاشق. سدران: ما قالوا لك أني مشوه وشين ..؟ قوت: من يقول أنك مشوه وشين ..؟ سدران: كلهم يقولون ..!! قوت: لكن أنا ما قوله يا سدران .. سدران: صحيح ..!! قوت: أي واللي جمالك يالقلب الطيب .. سدران: تزوجيني يا قوت ؟؟ قوت: إسأل أبوي ..