UJENZI DARAJA PANGANI WAFIKIA ASILIMIA 74.3

PANGANI, Tanga: UJENZI wa Daraja la Pangani lenye urefu wa mita 525 na barabara unganishi zenye jumla ya kilometa 25.6 umefikia asilimia 74.3 kufikia Septemba 30 mwaka huu. Kazi zilizokamilika ni pamoja na ujenzi wa kuta mbili unganishi za daraja ‘abutments’ na nguzo nane za kati ‘piers.’ Mradi huo umegharimu takriban Sh bilioni 45.6 hadi sasa, na unatekelezwa na Kampuni ya CHICO kutoka China chini ya usimamizi wa Wakala wa Barabara Tanzania (TANROADS) kwa ufadhili wa Serikali ya Tanzania na Benki ya Maendeleo ya Afrika (AfDB). Meneja wa TANROADS Mkoa wa Tanga, Mhandisi Msama Msama, amesema daraja hilo ni sehemu muhimu ya dhamira ya Serikali kufungua Ukanda wa Pwani ya Afrika Mashariki, unaounganisha Malindi – Mombasa – Lunga Lunga/Horohoro – Tanga – Pangani – Bagamoyo (Makurunge) wenye urefu wa kilometa 454. Amesema kukamilika kwake kutapunguza muda wa safari, kurahisisha biashara, kuchochea utalii, na kuimarisha uchumi wa buluu kupitia usafiri wa haraka kati ya bandari za Tanga, Dar es Salaam na Mombasa. Aidha, Mhandisi Msama ameeleza kuwa TANROADS inaendelea na utekelezaji wa miradi mingine mitatu ya dharura mkoani Tanga kufuatia athari za mvua za El Niño na Kimbunga Hidaya, yenye thamani ya jumla ya Sh bilioni 11.27. Miradi hiyo inahusisha ujenzi wa madaraja ya Msangazi, Bwiko na Sagasa, yote yakilenga kuboresha miundombinu na kuimarisha upatikanaji wa huduma za usafiri katika maeneo ya vijijini. Follow us on: FACEBOOK; SpotiLeo:   / spotileo-176.  . HabariLeo:   / habarileo   DailyNews:   / dailynewstz   INSTAGRAM; HabariLeo: https://instagram.com/habarileo_tz?ig... SpotiLeo: https://instagram.com/spotileo?igshid... TWITTER; Twitter HabariLeo: https://twitter.com/HabariLeo?s=09