Sing光路上丨張與辰帶觀眾重遊成長地 感謝幼稚園園長窩心舉動影響一生

Sing光路上丨張與辰帶觀眾重遊成長地 感謝幼稚園園長窩心舉動影響一生 每集《Sing光路上》都會邀請到唔同嘅歌手朋友上嚟傾下偈，今次主持 潘盈慧 就嚟到 張與辰 嘅家鄉馬來西亞，同與辰一齊睇下佢成長嘅地方。 講明睇下與辰嘅成長地，當然就要由佢嘅小學開始啦！佢帶大家重遊當年就讀嘅崑崙喇叭華文小學，與辰話覺得小學時代嘅自己好乖，亦算得上聰明，最初排班上嘅第一、第二，但後來自己就慢慢變壞，開始懶惰、貪玩唔做功課，由乖乖仔變成叛逆小孩，當然激到張媽媽扎扎跳，最後與辰就迎嚟藤條炆豬肉嘅下場，仲要係一炆就炆咗好幾年！ 與辰同大家分享馬來西亞學校同香港學校所教嘅科目分別，佢指馬來西亞學校會以馬拉文為主，但由於自己係讀華校，所以就以中文為主，不過都要學馬拉文同英文，至於其他科目就冇咩分別。對於被讚語言天賦高，與辰覺得因為自己係馬來西亞人嘅原因，因為平時生活上就已經會轉換好多種語言，佢仲即場嚟個「與辰小學堂」，教阿盈去馬來西亞旅行時會用到嘅馬拉文。 去完小學打卡，與辰又帶大家閒逛佢曾經居住過嘅地方，當中有充滿童年回憶嘅街道同店舖，與辰話自己參賽唱《一生何求》時，腦海中就係諗起喺呢個地方嘅回憶，佢仲話當時雖然唔係大富大貴，但就相當開心。 而喺同一個地區，就有與辰當年入讀嘅幼稚園，佢就同阿盈分享一件喺幼稚園年代發生嘅窩心事，呢件事仲影響咗佢嘅音樂路，與辰話而家諗起都好多謝當年幼稚園嘅園長呀！ 唔好睇與辰而家咁開朗健談，其實佢曾經試過情緒出現問題，對於有咁大嘅轉變，與辰就話信仰幫助好大，另外就係身邊嘅家人、同事、朋友，由唔識珍惜佢哋，到意識到一直都係呢班身邊人撐住自己，與辰指係身邊人令佢學識要進步嘅同時，亦要喺適當嘅時候停低，欣賞自己擁有嘅嘢。 嚟緊佢將會再次舉行個人演唱會，與辰坦言由參加《中年好聲音3》至今，一切都相當夢幻，同時佢又好多謝公司，除咗尊重每一位歌手嘅諗法外，亦願意聆聽歌迷嘅心聲。雖然年少時已經喺馬來西亞出道，但到中年先擁有唔同嘅榮耀，與辰就覺得呢一切都係嚟得剛剛好，佢仲話如果年少時自己已經有而家嘅成績，佢個人一定會變得好飄，但相對地跌落嚟時會更傷，甚至冇得翻身，所以佢好珍惜而家先擁有嘅一切。 #Sing光路上 #張與辰 #馬來西亞 #潘盈慧 #馬拉文 #一生何求 #開心 #成長地 #成就 #中年好聲音3 #情緒問題 #信仰 #珍惜 #幼稚園 #園長 #窩心 #TVB #娛樂新聞 #TVB娛樂新聞台 #ENews #HKENews #香港娛樂八卦新聞 #八卦新聞 即刻Follow TVB 娛樂新聞台 Facebook專頁   / tvbenews   登入myTV SUPER享受睇TVB自製節目7日包括娛樂新聞的免費點播 https://bit.ly/2TXLlM0