लुम्बिनी प्रदेश प्रहरी कार्यालयबाट सुस्ताको निरीक्षण/khasyaulikhabar

#susta #simabibadnepal #news भारतीय पक्षबाट हुने सीमा अतिक्रमण रोक्न तथा नागरिकता र लालपुर्जा उपलब्धसहित ६ बुदे माग गर्दै सुस्तावासीले काठमाडौंमा धर्ना दिएपछि सरकारले उनीहरूको समस्या समाधानमा चासो देखाएको छ । गृह मन्त्रालयको परिपत्रअनुसार आइतबार लुम्बिनी प्रदेश प्रहरी कार्यालयका प्रमुखसहित नेपाल प्रहरी र अन्य सुरक्षा निकायका प्रतिनिधिले सुस्ता क्षेत्रको स्थलगत निरीक्षण गरेका छन् । लगातारको वर्षाका कारण उर्लिएको नदी ईन्जिन जडित फेरीमा चढेर सुरक्षा टोली सुस्ता पुगेको थियो । लुम्बिनी प्रदेश प्रहरी कार्यालयका प्रमुख प्रहरी नायब महानिरीक्षक भुपेन्द्र बहादुर खत्रीसहित प्रहरी तालिम केन्द्र बुटवलका समादेशक दयानिधि ज्ञवाली, जिल्ला प्रहरी कार्यालय नवलपरासीका प्रहरी उपरीक्षक राम बहादुर केसी, नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय बुटवलका प्रहरी उपरीक्षक निशान राना, प्रहरी विशेष सुरक्षा गण नवलपरासीका प्रहरी उपरीक्षक डिबी मल्ल लगायत सहभागी टोलीले सुस्ताका अगुवा नेताहरुसंग भेटघाट गरेका थिए । सोही क्रममा सुस्तामा रहेको ईलाका प्रहरी कार्यालय, शसस्त्र प्रहरी बल नेपाल बोर्डर आउट पोष्ट सुस्ताको समेत निरिक्षण सुरक्षा टोलीबाट भएको थियो । स्थानियबासिन्दाहरुसंग प्रहरी नायब महानिरीक्षक खत्रीको प्रत्यक्ष संवादको क्रममा बाँध निर्माण तथा संरक्षण, सीमा सुरक्षा व्यवस्थापन, नागरिकताको समस्या लगायत विषयमा विशेष चासोका साथ जानकारी गराएका थिए । यसैबिच लुम्बिनी प्रदेश प्रहरी कार्यालयले सुस्ताको वडा नं. ५ मा रहेको जनता दलित आधारभुत विद्यालयमा अध्ययरत विद्यार्थीहरुलाई शैक्षिक सामग्री वितरण गरेको छ । लुम्बिनी प्रदेश प्रहरी कार्यालयका प्रमुख भुपेन्द्र बहादुर खत्री, स्थानिय जनप्रतिनिधि आदम खान, विद्यालय ब्यवस्थापन समितिका अध्यक्ष कमाल खानले विद्यार्थीहरुलाई शैक्षिक सामग्री वितरण गरे । वर्षौदेखी सीमा समस्या र पहिचानबाट बन्चित सुस्ताबासीहरु सरकारको पछिल्लो कदमबाट आफुहरुको समस्या सम्बोधन हुनेमा आशाबादी देखिएका छन ।